काठमाडौं । राष्ट्रिय खेलकुद परिषद् ‘राखेप’ अन्तर्गत तालिम तथा प्रशिक्षण विभागले विभिन्न खेलका मुख्य प्रशिक्षक तथा सहायक प्रशिक्षकलाई समावेश गराइ कार्यशाला सञ्चालन गरेको छ ।
मुख्यतः प्रदेश ५ हुने आठौँ राष्ट्रिय खेलकुदलाई लक्षित गरी शुरु गरिएको प्रतियोगिता सञ्चालन तथा व्यवस्थापन सम्बन्धी कार्यशालाको तालिम तथा प्रशिक्षण विभागका निर्देशक रिमबहादुर रानाभाटले आइतवार एक कार्यक्रमबीच सातदोबाटोमा उद्घाटन गरे ।
कार्यक्रमलाई सम्बोधन गर्दै निर्देशक रानाभाटले आठौँ राष्ट्रिय खेलकुदका साथै अन्य प्रतियोगितालाई कसरी व्यवस्थित रुपमा सञ्चालन गर्न सकिन्छ भन्ने विषयमा जानकारी गराउन तालिम आयोजना गरिएको बताए ।
उनले ठोस् योजना साथ खेलकुदको विकासमा अगाडि बढ्नु पर्ने आवश्यकता औल्याए ।
कार्यशालामा तालिम तथा प्रशिक्षण विभागका उप निर्देशक एवं कोर्ष डाइरेक्टर सुशीलनरसिंह राणाले सहभागीलाई प्रशिक्षकको जिम्मेवारी, खेलाडी तथा प्रशिक्षकको मूल्यांकन, प्रतियोगिता व्यवस्थापनलगायतका विषयमा जानकारी दिने छन् ।
कार्यशालाको अन्तिम दिन सोमबार आठौँ राष्ट्रिय खेलकुद तयारी सचिवालयका सचिव इन्द्र कार्कीले आठौं राष्ट्रियको तयारीलगायतका विषयमा प्रकाश पार्ने छन् ।
यो खबर पढेर तपाईलाई कस्तो महसुस भयो ?
प्रतिक्रिया