राजधानीका अव्यवस्थित तारको व्यवस्थापन गर्दै महानगर

काठमाडौं । काठमाडौं महानगरपालिकाले राजधानीका अव्यवस्थित तार व्यवस्थापनको काम आजबाट शुरु गरेको छ । आज (सोमबार) देखि राजधानीको न्युरोड र माइतीघरमा रहेको तार व्यवस्थित गर्न लागिएको हो ।

काठमाडौं महानगर, नेपाल दूरसञ्चार प्राधिकरण र इन्टरनेट सेवाप्रदायकका प्रतिनिधिबीच आइतबार भएको बैठकले सोमबारदेखि तार व्यवस्थापन गर्ने निर्णय गरेको थियो । यसअघि काठमाडौं महानगरपालिकाले १५ दिनको समय दिएर वैशाख २७ भित्र तार व्यवस्थापन नगरे काटिदिने सूचना सार्वजनिक गरेको थियो ।

आइतबार भएको बैठकले राजधानीका विभिन्न क्षेत्रमा चरणबद्ध रूपमा तार व्यवस्थापन गर्ने निर्णय गरेको इन्टरनेट सेवाप्रदायक सङ्घ (आइस्पान)ले जानकारी दिएको छ । सहमति अनुसार झुन्डिएका तार काट्ने र प्रयोग नभएका ५० प्रतिशत तार हटाइनेछ ।