ट्राफिकबाट बच्न अमिताभ बच्चनले लिए अपरिचित व्यक्तिसँग लिफ्ट

काठमाडौं । भारतीय अभिनेता अमिताभ बच्चनलाई बलिउडको सुपरहिरो भनिन्छ । ८० वर्षको उमेरमा पनि उनी युवाको जस्तै काम गरिरहेका देखिन्छन् । अमिताभ बच्चन सामाजिक सञ्जालमा पनि निकै सक्रिय रहन्छन् र फ्यानहरुलाई नयाँ–नयाँ जानकारी दिने गरेका छन् ।

उनी प्रायः केही रोचक कुराहरू सेयर गरिरहन्छन्। हालै अभिनेताले सामाजिक सञ्जालमा यस्तो पोष्ट सेयर गरेका छन् जसलाई फ्यानहरुले मन पराइरहेका छन् ।

अमिताभ बच्चन यतिबेला मुम्बईमा छन् र आफ्नो आगामी फिल्मको काममा व्यस्त छन् । फिल्मको सेटमा समयमै पुग्नु पर्ने थियो तर मुम्बईको ट्राफिकका कारण उनी समयमा पुग्न नसक्ने भएपछि उनले एक अपरिचित व्यक्तिको बाइकमा लिफ्ट लिएका थिए । बिग बी गएर त्यो व्यक्तिको बाइकमा बसे। र आफूलाई फिल्म सेटसम्म पुर्याउन आग्रह गरे । उक्त तस्बिरहरु सामाजिक सञ्जालमा निकै भाइरल भइरहेका छन् ।

अमिताभले इन्स्टाग्राममा यसको फोटो पनि सेयर गरेका छन् । जसमा उनी एक पुरुषको रोयल इन्फिल्ड बाइकमा बसेको देखिन्छ । तस्बिरसँगै उनले क्याप्शनमा लेखेका छन्- ‘सवारीको लागि धन्यवाद साथी…म तिमीलाई चिन्दिन तर तिमीले मलाई समयमै सेटमा पुग्न मद्दत गर्यौ… धन्यवाद।’