आईपीएल रेस : मुम्बई, बैंग्लोर र राजस्थानमध्ये को पुग्ला प्लेअफमा ?

काठमाडौं । आईपीएल २०२३ मा प्लेअफको रेस निकै रोमाञ्चक बनेको छ । शनिबार भएको खेलमा चेन्नई सुपर किंग्सले दिल्ली क्यापिटल्सलाई र लखनउ सुपर जायन्ट्सले कोलकाता नाइट राइडर्सलाई हराउँदै प्लेअफमा स्थान पक्का गरिसकेका छन् । अब प्लेअफमा एक स्थान मात्रै बाँकी रहेको छ र त्यो पनि आज हुने दुई खेलबाट टुंगो लाग्नेछ ।

आज आइतबार मुम्बई इन्डियन्स र सनराइजर्स हैदरावाद र रोयल च्यालेन्जर्स बैंग्लोर र गुजरात टाइटन्सबीचको खेल हुँदैछ । अब प्लेअफमा पुग्न मुम्बई, बैंगलोर र राजस्थानबीच भिडन्त छ । यीमध्ये जुन टोली छनोट हुन्छ, उक्त टोली चौथो स्थानमा रहनेछ ।

चेन्नई र लखनउ बाहेक गुजरात टाइटन्स पनि प्लेअफमा पुगिसकेको छ । योसँगै कोलकाता नाइट राइडर्स, पञ्जाब किंग्स, दिल्ली क्यापिटल्स र सनराइजर्स हैदरावादका टोली बाहिरिएका छन् । प्लेअफमा पुग्न मुम्बई, राजस्थान र बैंगलोरका लागि के आवश्यक छ त ?

मुम्बई इन्डियन्स : 

मुम्बई इन्डियन्सले हालसम्म १३ खेल खेलेको छ । खेलेको १३ खेलमा मुम्बईले सात खेलमा जित हात पारेको छ भने छ खेलमा हार व्यहोर्दै १४ अंक जोडेको छ।

मुम्बईको नेट रन रेट ०.१२८ रहेको छ। मुम्बईले प्लेअफमा आफ्नो स्थान बनाउनका लागि हैदरावादविरुद्धको खेल जित्नैपर्ने हुन्छ । हैदरावादविरुद्धको खेल जिते पनि बैंगलोरले गुजरातसँगको खेलमा हार व्यहोरेमा मात्रै मुम्बईको प्लेअफका लागि बाटो खुल्नेछ ।
।

रोयल च्यालेन्जर्स बैंगलोर : 

रोयल च्यालेन्जर्स बैंगलोरको लिग चरणको अन्तिम खेल हो । यो खेलमा मुम्बई मात्र होइन राजस्थान रोयल्सको पनि नजर रहनेछ । आरसीबीको घरेलु मैदान चिन्नास्वामी स्टेडियममा बैंगलोर र गुजरातबीच खेल हुँदैछ । यदि बैंग्लोरको टोलीले यो खेल जित्न सफल भयो भने प्लेअफमा पुग्ने छ र मुम्बई–राजस्थान बाहिरिनेछ ।

हारले भने टोलीका लागि समस्या निम्त्याउन सक्छ। बैंगलोरको हाल १३ खेलबाट ७ जित र ६ हारसहित १४ अंक रहेको छ। बैंगलोरको नेट रन रेट  ०.१८० छ। यदि बैंगलोरको टोली हार्यो र मुम्बईले जित निकाल्यो भने मुम्बई प्लेअफमा पुग्ने छ।

राजस्थान रोयल्स : 

राजस्थान रोयल्सले लिग चरणका सबै खेल खेलिसकेको छ । राजस्थानले १४ खेलमा सात जित र सात हारसहित १४ अंक जोडेको छ । राजस्थानको नेट रन रेट  ०.१४८ छ। राजस्थानलाई प्लेअफमा पुग्न पहिले मुम्बई र बैंगलोरले आ–आफ्ना खेल हारे भने मात्रै सम्भव रहेकोछ ।

यससँगै बैंगलोरले पाँच रन वा सोभन्दा बढीको अन्तरले लक्ष्य पूरा गर्छ वा गुजरातले १९.३ ओभरअघि लक्ष्य पूरा गर्छ भन्ने पनि राजस्थानको प्लेअफमा पुग्ने सम्भावना रहन्छ ।