एजेन्सी । म्यान्चेस्टर सिटी काराबाओ कप फुटबल प्रतियोगिताको फाइनलमा प्रवेश गरेको छ ।
बुधवार राति सम्पन्न भएको सेमिफाइनलको दोस्रो लेगको खेलमा म्यान्चेस्टर सिटीले बुर्टोन अल्बियनलाई १-० गोल अन्तरले पराजित गरेको हो । बुर्टोनलाई समग्रमा १०-० गोल अन्तरले हराउँदै सिटीले फाइनलमा प्रवेश गरेको हो ।
म्यान्चेस्टर सिटीका लागि सर्जियो अग्युरोले गरेको एक मात्र गोल नै निर्णायक बनेको थियो । उनले खेलको २६ औँ मिनेटमा गोल गरेका थिए । प्रतिस्पर्धात्मक बनेको खेलको पहिलो हाफसम्म एक गोलले अगाडि रहेको सिटीले दोस्रो हाफमा भने थप गोल गर्न सकेन ।
दोस्रो हाफमा केही सुधारिएको खेल खेलेको बुर्टोनले निर्धारित समयसम्म केही गोल गर्ने मौका पाएपनि सदुपयोग भने गर्न सकेन् । यसअघि भएको पहिलो लेगको खेलमा म्यान्चेस्टर सिटीले बुर्टोनलाई ९-० गोल अन्तरले पराजित गरेको थियो ।
अब सिटीले उपाधिका लागि चेल्सी र टोट्नह्यामबीचको विजेतासँग प्रतिस्पर्धा गर्नेछ ।
यो खबर पढेर तपाईलाई कस्तो महसुस भयो ?
प्रतिक्रिया