‘सम्हालिन्छ कहिले मन’ को औपचारिक घोषणा, पूजासँग आकाश र सोनमको रोमान्स

काठमाडौं । चर्चित गीत सम्हालिन्छ कहिले मनको नाम सापटी लिएर निर्माण हुन लागेको फिल्म ‘सम्हालिन्छ कहिले मन’ को औपचारिक घोषणा गरिएको छ । महिनौँदेखि चर्चा चलिरहेको यो फिल्मको काठमाडौंमा कार्यक्रमको आयोजना गरी औपचारिक घोषणा गरिएको हो ।

म्युजिकल लभ स्टोरी भनिएको यो फिल्ममा पूजा शर्मा, आकाश श्रेष्ठ र सोनम तोप्देनको मुख्य भूमिका रहनेछ भने गौरी मल्ल, सरोज खनाल, धिरेन शाक्य लगायतका कलाकारले समेत अभिनय गर्नेछन् । फिल्म युनिटले जनाए अनुसार अन्य कलाकार भने छनोट हुन बाँकी छ ।

महेश दवाडीको कथा रहने यो फिल्म त्रिकोणात्मक प्रेमकथामा बन्नेछ । चलचित्रमा अमित बस्नेत निर्माता छन् । यस्तै परी राना, अजितकुमार थापा सह–निर्माता छन् भने सनिष खकुरेल कार्यकारी निर्माता छन् ।

फिल्ममा सौरभ लामाको छायांकन रहनेछ । यस्तै कविराज गहतराजको कोरियोग्राफी रहनेछ । सुदर्शन थापाले निर्देशन गर्ने यो फिल्ममा रोमान्टिक लभ स्टोरी हुनेछ । यसअघि पूजा र आकाशको जोडी फिल्म ‘रामकहानी’ मा देखिएको थियो भने सुदर्शन र पूजाले प्रायः सबै फिल्ममा एकसाथ काम गर्दै आएका छन् ।