काठमाडौं । सरकारले आज आइतवारदेखि उपसचिव तहका कर्मचारीको समायोजन शुरु हुने भएको छ ।
संघ, प्रदेश र स्थानीय तहमा जाने उपसचिव तहका कर्मचारीको समायोजन आजबाट शुरु हुन लागेको हो । सरकारले संघमा ४७ हजार ९२०, प्रदेशमा २२ हजार ७५५ र स्थानीय तहमा ६७ हजार ५०३ कर्मचारी समायोजन गर्ने भएको हो ।
संघीय मामिला तथा सामान्य प्रशासन मन्त्रालयका प्रवक्ता सुरेश अधिकारीले ‘कर्मचारी समायोजन अध्यादेश’ अनुसार अनलाइन फाराम भरेका उपसचिव तहका कर्मचारीलाई समायोजनको पत्र दिने बताए ।
फाराम भर्दा प्रयोग गरेको ईमेल र राहदानीका आधारमा मन्त्रालयको वेबसाइटबाट आफैंले नै समायोजनको पत्र प्रिन्ट गर्न सक्ने व्यवस्था गरेको प्रवक्ता अधिकारीले बताए ।
उपसचिवहरुले आफ्नो समायोजनको पत्र मन्त्रालयको वेबसाइटमा गएर आफैं प्रिन्ट गरेर बुझ्न सक्ने व्यवस्था गरिएको छ । सरकारले करिब २ हजार उपसचिव तीनै तहमा समायोजन गर्दैछ ।
यसअघि सरकारले पहिलो चरणमा सचिवलाई समायोजन गरिसकेको छ भने सहसचिवको समायोजन गर्न स्वीकृति माग गर्दै प्रधानमन्त्री तथा मन्त्रिपरिषद्मा पत्र पठाइएको छ । उपसचिवको समायोजन सकिएपछि शाखा अधिकृतदेखि तल्लो तहका कर्मचारीलाई समायोजन गरिने मन्त्रालयले जनाएको छ ।
आगामी फागुन ३ गतेसम्म अनलाइन आवेदनका आधारमा सबै कर्मचारीको समायोजन गरिसक्ने तयारी सरकारको रहेको छ ।
यो खबर पढेर तपाईलाई कस्तो महसुस भयो ?
प्रतिक्रिया