काठमाडाैं । साफ च्याम्पियनसिपको समूह चरणको समिकरण पूरा भएको छ । चार टोलीहरुले सेमिफाइनलमा आफ्नो स्थान पक्का बनाएका छन् । समूह ‘ए’ बाट कुवेत र भारत अन्तिम चारमा पुगेका छन् भने समूह ‘बी’ बाट लेबनान र बंगलादेशको टोली सेमिफाइनलमा पुगेका छन् ।
अब सेमीफाइनलमा कुवेतले बंगलादेशसँग र लेबनानले भारतसँग भिड्ने छन् । दुवै सेमिफाइनल खेल जुलाई १ अर्थात असार १६ गते शनिबार मा हुनेछ । कुवेत र बंगलादेशको खेल दिउँसो ३ बजे र भारत र लेबनानबीचको खेल साँझ ७:३० बजे शुरु हुनेछ ।
भारत र लेबनान दुवै उत्कृष्ट लयमा
समूह ‘बी’ को अन्तिम खेलमा लेबनानले बुधबार माल्दिभ्सलाई १–० गोल अन्तरले हराएको छ । टोलीका लागि कप्तान हसन माटूकले २४ औं मिनेटमा फ्रिकिकमा महत्वपूर्ण गोल गरे । टोलीले समूह चरणका तीनवटै खेल जितेर शीर्ष स्थानमा बनाएको हो । योसँगै भारतीय टोली समूह (ए) चरणका तीनमध्ये दुई खेल जित्न सफल भएको छ । भारतले पाकिस्तानलाई ४–० र नेपाललाई २–० ले हराएको थियो । समूहको अन्तिम खेल कुवेतसँग १–१ गोलको बराबरीमा सकिएको थियो । यस्तो अवस्थामा दुवै टोलीबीच रोचक प्रतिस्पर्धा देख्न सकिन्छ ।
हेड टु हेड
भर्खरै सम्पन्न इन्टरकन्टिनेन्टल कपको फाइनलमा भारतले लेबनानलाई पराजित गर्दै उपाधि जितेको थियो । अहिलेसम्म दुवै टोली आठ पटक भिडेका छन् । जसमध्ये भारतले दुई र लेबनानले तीन खेल जितेको छ । त्यस्तै, तीन खेल बराबरीमा सकिएको छ ।
यी दुई टोली सन् १९७७ मा राष्ट्रपति कपमा पहिलो पटक आमनेसामने भएका थिए । त्यसपछि भारतले लेबनानलाई ४–२ ले हराएको थियो । त्यसपछि यी दुई टोली सन् १९९३ मा फिफा विश्वकप छनोटमा दुईपटक भिडेका थिए। एउटा खेल २–२ को बराबरीमा सकिएको थियो भने अर्को खेलमा लेबनानले भारतलाई २–१ ले हराएको थियो । यसपछि सन् २००७ मा फिफा विश्वकप छनोटमा पनि यी दुई टोलीबीच भिडन्त भएको थियो । अक्टोबर ८, २००७ मा भएको खेलमा लेबनानले भारतलाई ४–१ ले हराएको थियो । यसपछि ३० अक्टोबर २००७ मा दुई टोलीबीच भएको खेल २–२ को बराबरीमा टुंगिएको थियो । फिफा वरियतामा लेबनान ९९औँ स्थानमा छ भने भारत १०१औँ स्थानमा रहेको छ ।
यो खबर पढेर तपाईलाई कस्तो महसुस भयो ?
प्रतिक्रिया