कर्ण शाक्यको ‘कोष’ लोकार्पण गरियो

काठमाडौं । व्यवसायी कर्ण शाक्यको नयाँ पुस्तक ‘कोषः जीवनपछिको जीवन’ लोकार्पण गरिएको छ । काठमाडौंमा मङ्गलबार आयोजित कार्यक्रममा समता स्कुलका संस्थापक उत्तम सञ्जेल, समालोचक/साहित्यकार गीता त्रिपाठी र लेखक शाक्यले पुस्तक लोकार्पण गरे । 

कार्यक्रममा शिक्षासेवी सञ्जेलले नेपालमा उद्यमशीलताको विकास हुनुपर्नेमा जोड दिँदै कर्ण शाक्यका पुस्तकले उद्यमशीलता विकासमा सघाउने धारणा राखे । शिक्षाको विकासबाट मात्र कुनै पनि देशले समृद्धि हासिल गर्न सक्ने र विकासको बाटोमा अघि बढ्ने उनले बताए । त्यसका लागि समताले देशका सबै जिल्ला र  बङ्गलादेश, श्रीलङ्कालगायत १२ मुलुकमा समता स्कुल सञ्चालन गरेको उनको भनाइ छ । 

‘कर्ण शाक्य आफू धनी हुन् नै, उनी देशका सबै नागरिक धनी हुनुपर्छ भन्ने सोच्छन्,’ सञ्जेलले भने, ‘यो पुस्तकले पनि त्यही धनी हुने बाटो सिकाउँछ ।’ सँगै कर्मशीलताको बाटोमा मानिसलाई अघि बढाउन पनि पुस्तक फलदायी हुने उनको भनाइ छ ।

उक्त अवसरमा साहित्यकार त्रिपाठीले शाक्यको यो पुस्तकलाई ‘व्यवहार सिकाउने गीता’का रुपमा चित्रण गरिन् । ‘कर्ण शाक्यका पुस्तक पढ्दै जाँदा कताकता निजात्मक लाग्छन्,’ उनले भनिन्, ‘बुझ्दै जाँदा भने ती सार्वजनिन लाग्छन् ।’ साथै उनले ७५ वर्ष कटिसक्दा पनि शाक्यमा रहेको लेखन ऊर्जाको तारिफ गरिन् । भनिन्, ‘शाक्य लेखाइमा ३० बर्से युवा जस्ता लाग्छन् ।’

कार्यक्रममा लेखक शाक्यले आफू सधैं कर्ममा विश्वास गर्ने व्यक्ति रहेको बताए । कुनै पनि देशको विकास फुस्रा भाषणबाट मात्र सम्भव नरहेको र त्यसका लागि कर्मयोगी व्यक्तिको अपरिहार्यता रहेको उनको भनाइ छ । ‘भाषणले भात पाक्दैन,’ उनले भने, ‘कर्मले पाक्छ । म सधैं धन र धान उमार्ने क्षेत्रमा लागिपर्न रुचाउँछु ।’ 

सकारात्मक सोचले आफूलाई जहिल्यै अघि बढ्न सघाएको शाक्यले बताए । साथै चुनौतीबाट आफू कहिल्यै पछि नहट्ने उनको भनाइ छ । ‘चुनौती र समस्याबाट भाग्ने मान्छेले कहिल्यै प्रगति गर्दैन,’ उनले भने, ‘कुनै पनि कामलाई मूर्त रुप दिन सकारात्मक सोच त आवश्यक हुन्छ नै, सँगै त्यसलाई व्यहारमा लागू गर्न खोज पनि अपरिहार्य रहन्छ ।’ 

कार्यक्रममा फाइनप्रिन्टका अजित बरालले नारायण वाग्लेको पल्पसा क्याफेले जसरी नेपाल आख्यानलाई लोकप्रिय बनायो, त्यसरी नै कर्ण शाक्यको सोचले नेपाली गैरआख्यानलाई पनि त्यस्तै बनाएको बताए ।  

रङ्गकर्मी प्रकाश सायमीले कार्यक्रममा कर्ण शाक्यको बाहुआयामिक व्यक्तित्वका बारेमा चर्चा गरेका थिए । पुस्तकले व्यावहारिक ज्ञानमा जोड दिने र मानिसलाई उद्यमशील बनाउन सघाउने उनको भनाइ छ । खोक्रा सिद्धान्त मात्र नभई उद्यमशीलताका व्यावहारिक पक्ष उल्लेख रहेको यो पुस्तक उपयोगी रहेको उनले बताए ।

पुस्तक फाइनप्रिन्टले प्रकाशनमा ल्याएको हो ।  पुस्तकको मूल्य ४९८ रुपैयाँ रहेको छ । 

(इमेलमा प्राप्त)

यो खबर पढेर तपाईलाई कस्तो महसुस भयो ?