काठमाडौं । तेस्रो संस्करणको धनगढी प्रिमियर लिग ‘डिपिएल’ क्रिकेट प्रतियोगिता यहि शनिवारदेखि शुरु हुँदैछ ।
त्यस्तै यसपटक उपाधि राशीमा वृद्धि गर्दै ३० लाख पु¥याइएको छ । आयोजक धनगढी क्रिकेट एकेडेमीका अध्यक्ष सुवास शाहीले विगतका संस्करणझैँ यसपटक पुरस्कार सर्वाधिक धनराशिमा वद्धि गरेको बताए ।
आयोजकका अनुसार मैदान तथा प्राविधिक व्यवस्थापनको काम सकिएको पनि जानकारी दिए ।
‘मैदान तथा पाँचवटा पिच निर्माण सम्पन्न भइसकेको छ, प्रतियोगिता आयोजनाका विभिन्न समितिले पनि आआफ्ना जिम्मेवारी कुशलतापूर्वक निर्वाह गरिरहेका छन्।’ उनले भने, ‘क्रिकेटलाई अझ योजनाबद्ध र व्यावसायिक हिसाबले लैजान धनगढी क्रिकेट एकेडेमी ‘डिसिए’ जहिलै नयाँ योजनाका साथ आउने गरेको छ, सोही परिवेशमा शहर केन्द्रीत ‘फ्रेन्चाइज’ सोचको क्रिकेटलाई थप परिस्कृत रूपमा अगाडि बढाइरहेका छौँ ।’
अन्तर्राष्ट्रिय क्रिकेट परिषद् ‘आइसिसी’बाट मान्यता प्राप्त प्रतियोगिता डिपिएल–३ मा धनगढी स्टार्स, रुपेन्देही च्यालेन्जर्स, महेन्द्रनगर यूनाइटेड, सिवाइसी अत्तरिया, काठमाडौँ गोल्डेन्स र विराटनगर किङ्ग्सको सहभागिता रहनेछ ।
सबै टोलीमा १२ ‘अक्सन’बाट लिइएका खेलाडी, एक रणनीतिक खेलाडी र दुईजना विदेशी खेलाडी रहने छन् ।
प्रतियोगिताको ‘गुडविल एम्बास्डर’मा दक्षिण अफ्रिकाका पूर्व क्रिकेटर जोन्टी रोड्स रहेका छन् । रोड्स माघ २४ गते धनगढी आइपुग्ने कार्यक्रम रहेको छ । त्यस्तै प्रतियोगिताको गोल्डस्टार मोष्ट भेल्युएवल प्लेयरलाई गोल्डस्टार सुनको जुत्ता दिइनेछ ।
प्रत्येक खेलका नबिल बैंक म्यान अफ द म्याचलाई १५ हजार, म्यान अफ द सिरिज, वेस्ट ब्याट्सम्यान र बेस्ट बलरलाई समेत उचित पुरस्कारको व्यवस्था गरिएको छ ।
प्रतियोगिता सम्पन्न गर्न पाँच करोड लागत खर्च हुने आयोजकको अनुमान छ ।
पहिलो संस्करणको डिपिएलको बजेट एक करोड ८२ लाख थियो भने कूल पुरस्कार २८ लाख ५० हजार थियो । त्यस्तै दोस्रो संस्करणमा तीन करोडको लागतमा प्रतियोगिता सम्पन्न भएको थियो, जसमा विजेतालाई २५ लाखसहित कुल ५० लाख पुरस्कार प्रदान गरिएको थियो ।
यस्तो छ खेल तालिका
डिपिएल क्रिकेट अन्तर्गत पहिलो खेल माघ २६ गते शनिबार दिउँसो १ बजेपछि शुरु हुनेछ । त्यसअघि उद्घाटन कार्यक्रम रहनेछ । प्रतियोगिता टि–२० को आधारमा हुनेछ ।
लिग चरणमा प्रत्येक टिमले एकापसमा एक–एक खेल खेल्ने छन् । शीर्ष चार टोली प्ले–अफमा पुग्नेछन् । त्यसमा पहिलो र दोस्रो हुने टिमको विजेता फाइनल पुग्नेछ । त्यसमा पराजित हुने टोलीले तेस्रो र चौथो हुने टिमसँगको विजेतासँग फाइनल प्रवेशको लागि खेल्नेछ ।
दोस्रो संस्करणमा झैँ यस संस्करणमा पनि प्रतियोगिताको उद्घाटन समारोहमा ‘डिसिए’ले राष्ट्रिय तथा अन्तर्राष्ट्रिय प्रतियोगितामामा सहभागी एक पूर्व खेलाडीलाई ‘धनगढी क्रिकेट सम्मान’ तथा नेपाली क्रिकेटमा महत्वपूर्ण योगदान दिने एक व्यक्तिलाई ‘अर्जुन खड्का स्मृति सम्मान’ स्वरुप एक÷एक लाखको पुरस्कार प्रदान गरिने आयोजकले जनाएको छ ।
गत वर्ष धनगढी क्रिकेट सम्मानबाट नेपाली राष्ट्रिय टोलीका पूर्वप्रशिक्षक राजु खड्का तथा अर्जुन खड्का स्मृति सम्मानबाट राखेपका पूर्वप्रशिक्षक अरुणकुमार अर्याल सम्मानित भएका थिए ।
के हो डिपिएल
डिपिएल ‘होटल डिभोटी एसपीए कप’ र नेपालमै पहिलो पटक खेलाडीको अक्सन प्रक्रियाद्वारा आयोजित ‘सगरमाथा सिमेन्ट धनगढी क्रिकेट लिग’को मर्जरको नयाँ स्वरुप हो । एसपिए कपको शुरुवात सन् २०१० मा गरिएको थियो ।
अस्थायी प्यारापिट निर्माण र यातायात सेवा
प्रतियोगिताका लागि पाँच हजार दर्शक क्षमताको अस्थायी प्यारापिट निर्माण गरिसकिएको छ । दर्शकका लागि टिकटदर लिग चरणमा रु ५०, प्ले–अफमा ७० र फाइनलमा एक सय रुपैयाँ तोकिएको छ ।
टिकट बिक्रीको २० प्रतिशत रकम फाप्ला अन्तर्राष्ट्रिय निर्माण अभियान ‘ड्रिम फाप्ला’लाई छुट्याइने तथा ४० प्रतिशत रकम सहभागी टिमलाई प्रदान गरिनेछ ।
दर्शकको सुविधालाई मध्यनजर राख्दै सुदूरपश्चिम यातायात व्यवसायी सङ्घ, कर्णाली रिभर यातायात सङ्घ र धनगढी उपमहानगरपालिकाको सहयोगमा दैनिक क्याम्पस रोडदेखि फाप्ला क्रिकेट मैदानसम्म निःशुल्क बस सेवाको व्यवस्था गरिएको छ ।
बाल विवाह अन्त्यका लागि सहकार्य
प्रिमियर लिग ३ मा बाल विवाहविरुद्धका जनचेतनामूलक सन्देश प्रवाह हुने भएका छन् ।
सिरिजभरि उद्घोषकले बालविवाह न्यूनीकरणका लागि जनचेतनामूलक सन्देश प्रवाह गर्ने सहकार्य आयोजक धनगढी क्रिकेट एकेडेमीले वल्र्ड भिजन इइन्टरनेशनल नेपालले गरेको छ । खेल मैदान वरपर र स्कोर बोर्डमा पनि बाल विवाहसम्बन्धी सन्देश राखिनेछन् ।
प्रतियोगिताका लागि क्लबले गत पुस २१ गते अक्सनबाट १२ खेलाडी लिइसकेका छन् भने तीन÷तीन विदेशी खेलाडीसमेत अक्सनपछि अनुबन्ध गरिसकेका छन् । अक्सनमा सहभागी २ सय ५ खेलाडीमध्ये ७२ खेलाडी बिक्री भएका थिए ।
अक्सनमा सहभागी ६ वटा टोलीमध्ये खेलाडी खरीदका लागि वसन्त रेग्मी रणनीतिक खेलाडी रहेको रुपन्देही च्यालेञ्जर्सले १४ लाख ४५ हजार, सोमपाल कामी रणनीतिक खेलाडी रहेको धनगढी स्टार्सले १२ लाख २० हजार, शरद भेषवाकर रणनीतिक खेलाडी रहेको महेन्द्रनगर युनाइटेडले ११ लाख ५० हजार, ज्ञानेन्द्र मल्ल रणनीतिक खेलाडी रहेको काठमाडौं गोल्डेन्सले १० लाख ९५ हजार, करन केसी रणनीतिक खेलाडी रहेको विराटनगर किंग्सले नौ लाख ९० हजार तथा दीपेन्द्र ऐरी रणनीतिक खेलाडी रहेको सिवाइसी अत्तरियाले नौ लाख खर्च गरेका थिए ।
अक्सनमा विनोद भण्डारी, ललित नारायण राजवंशी, ललितसिंह भण्डारी, भीम सार्की, पवन सर्राफ र आरिफ शेख अधिकतम मूल्य दुई लाख ५० हजार हजारमा बिक्री भएका थिए ।
त्यस्तै यस पटक प्रदीप ऐरी रुपन्देहीमा दुई लाख ४० हजार, सन्दीप जोरालाई सीवाईसी अत्तरियामा २ लाख ३० हजार, रोहित पौडेल २ लाख ३० हजार र भुवन कार्की अत्तरियामा २ लाख १० हजारमा अनुबन्धित भएका थिए ।
यो खबर पढेर तपाईलाई कस्तो महसुस भयो ?
प्रतिक्रिया