अभिनेत्री निरूता सिंहले कसिन लगनगाँठो

काठमाडौं । नेपाली चलचित्र क्षेत्रमा कुनै समय एकछत्र राज गरेकी अभिनेत्री निरूता सिंह विवाह बन्धनमा बाँधिएकी छन् । उनले मुम्बईका सञ्जीभ गुलाटीसँग विवाह गरेकी हुन्।

शनिबार सामाजिक सञ्जाल फेसबुकमा स्टाटस लेख्दै उनले गत अगस्ट ३१ मा गुलाटीसँग बिहे गरकेो जानकारी दिएकी छन्।

उनले सामाजिक सञ्जालमा सम्पूर्णको माया अनि आशीर्वादको अपेक्षा गरेको बताएकी छन् । साथै उनले चाँडै नेपाल आउने समेत वाचा गरेकी छन्।

उनले सामाजिक सञ्जालमा लेखेकी छन्ः

मलाई माया गर्नु हुने मेरो सम्पूर्ण घर परिवार, आफन्त तथा छर छिमेकीहरू, मेरा चलचित्रकर्मी साथीभाइ अनि अग्रज व्यक्तित्वहरू, बिभिन्न माध्यमका संचारकर्मीहरुलगायत मलाई माया गरेर मेरो चलचित्र हेरेर मेरो चलचित्रलाई सफल बनाई मलाई ‘निरुता सिंह’ बनाईदिनु हुने मेरा सम्पूर्ण माननीय, पूजनीय अनि ढोगनीय दर्शक महानुभावहरूको यतीका वर्ष देखीको एक मात्र प्रश्न, जसको बिना मेरो कुनै पनि अन्तरवार्ता पूर्ण हुँदैन थियो । त्यो हो ‘निरुताजी बिहे कहिले गर्ने ?’ भन्ने प्रश्न ‘आज तेसै प्रश्नको जवाफ दिन गई रहेको छु ।

तपाईँहरूको निरूता सिंहले गत बिहिबारका दिन मुम्बई निवासी सञ्जीव गुलाटीसँग लगनगाँठो जोडेको छ । हजुरहजुर सम्पूर्णको माया अनि आशीर्वादको अपेक्षा गरेको छु । चाडै सबैलाई भेट गर्न अनि आशीर्वाद लिन नेपाल आउने छु । धेरै धेरै माया ।’