एजेन्सी । इंग्लिस क्लब चेल्सी जारी युरोपा लिग फुटबल प्रतियोगिताको क्वाटरफाइनलमा प्रवेश गरेको छ ।
बिहीवार राति सम्पन्न भएको प्रि क्वाटरफाइनलको खेलमा चेल्सीले युक्रेनको क्लब डाइनामो किभलाई ५-० गोल अन्तरले पराजित गर्दै अन्तिम आठको स्थान तय गरेको हो । चेल्सीका लागि ओलिभर जेरुडले ह्याट्रिक गरेका थिए । उनले खेलको पाँचौ, ३३ औँ र ५९ औँ मिनेटमा तीन गोल गरेका थिए ।
त्यस्तै बाँकी दुई गोल भने मार्कोस एलोन्सो र कलम हुडसनले समान एक-एक गोल गरेका थिए । एलोन्सोले खेलको पहिलो हाफ सकिनै लाग्दा र हुडसनले खेलको ७८ औँ मिनेटमा गोल गरेका थिए । समग्रमा चेल्सीले ८-० को नतिजा निकाल्दै अघिल्लो चरणमा प्रवेश गरेको हो ।
यसअघि भएको पहिलो लेगको खेलमा चेल्सीले ३-० गोल अन्तरको अग्रता लिएको थियो ।
त्यस्तै बिहीवार राति नै भएको अर्को खेलमा आर्सनलले रेनेसलाई ३-० गोल अन्तरले पराजित ग-यो । आर्सनललाई जित दिलाउन एम्रिक आबुमियाङले दुई तथा मिटल्याण्ड निल्सले एक गोल गरे । समग्रमा आर्सनलले रेनेसलाई ४-३ गोल अन्तरको जित निकाल्दै अघिल्लो चरणमा पुगेको हो ।
बिहीवार राति नै भएका अन्य खेलहरुमा बेन्फिकाले डिनामो जाग्रेबलाई, स्लाभिया पाराग्वेले सेभिल्लालाई, भिल्लारियलले जेनिट सेन्ट पिटर्सवर्गलाई तथा भ्यालेन्सियाले एफके क्रान्सनोदरलाई हराउँदै अघिल्लो चरणमा प्रवेश गरेका छन् ।
यो खबर पढेर तपाईलाई कस्तो महसुस भयो ?
प्रतिक्रिया