विराटनगर । पाँचौ संस्करणको साफ महिला फुटबल अन्तर्गत नेपाल र भारतबीचको खेल जारी छ ।
विराटनगरस्थित शहिद रगंशालामा जारी भएको खेलको पहिलो हाफसम्म नेपाल र भारतले समान एक-एक गोलको बराबरी गरेको थियो । प्रतिस्पर्धात्मक बनेको खेलको शुरुवाती समयदेखि नै नेपालले निक्कै आक्रामक खेल खेलिरहेको छ ।
खेलको १६ औँ मिनेटमा भारतिय खेलाडीले प्रहार गरेको बल नेपालका गोलरक्षक अञ्जली सुब्बाले उत्कृष्ट बचाउ गरिन् । त्यस्तै १९ औँ मिनेटमा नेपालका साबित्रा भण्डारी ‘साम्बा’ वान भर्सेस वानमा गोल गर्न चुकिन् । २३ औँ मिनेटमा पनि ‘साम्बा’ गोल गर्न असफल भइन् । उनको प्रहार भारतिय गोलरक्षक सहजै आफ्नो नियन्त्रणमा लिइन् ।
२६ औँ मिनेटमा भारतका डालिमा चिबेरले फ्रिकिकमार्फत गोल गर्दै टिमलाई शुरुवाती अग्रता दिलाइन् । भारतले गोल गरेपनि निक्कै आक्रामक बनेको नेपालले खेलको ३३ औँ मिनेटमा बराबरी गोल फर्कायो । ‘साम्बा’ले हेडमार्फत गोल गर्दै खेललाई एक-एक गोलको बराबरीमा ल्याउन सफल भइन् ।
त्यस्तै ४० औँ मिनेटमा साम्बा पुनः गोल गर्न चुकिन । पहिलो हाफ सकिनै लाग्दा साम्बाको प्रहार रिबाउन्ड भएको बलमा कप्तान निरु थापा गोल गर्न असफल भइन् । पहिलो हाफको थपिएको समयमा अनिता बस्नेतको प्रहार आकासियो ।
दोस्रो हाफमा भने नेपालले फितलो प्रर्दशन गरेको थियो । ५९ औँ मिनेटमा भारतिय खेलाडीको प्रहार नेपालका डिफेन्डर हिरा कुमारी भुजेलले क्लियर गरिन् । खेलको ६३ औँ मिनेटमा भारतले खेलमा २-१ को अग्रता लियो ।
भारतका ग्रिस डाङमेईले नेपाली टिमको कमजोर डिफेन्सको फाइदा उठाउँदै गोल गरिन् ।
यो खबर पढेर तपाईलाई कस्तो महसुस भयो ?
प्रतिक्रिया