एन्फा अध्यक्ष नेम्वाङको बर्खास्तीको प्रस्ताव अस्वीकृत

काठमाडौं । अखिल नेपाल फुटबल संघ (एन्फा) का अध्यक्ष पंकजविक्रम नेम्वाङविरुद्धको बर्खास्तीको प्रस्ताव अस्वीकृत भएको छ ।

बिहीबार हेटौँडामा एन्फाको विशेष साधारण सभामा उनीविरुद्धको अविश्वासको प्रस्तावका लागि मतदान भएको थियो । मतदानमा ५३ मत खसेको थियो । ८७ जना प्रतिनिधि रहेकोमा ५३ जनाले मात्रै मतदान गर्दा उनलाई हटाउन पुग्ने मत नदेखिएपछि प्रस्ताव अस्वीकृत भएको हो ।

अध्यक्षविरुद्धको अविश्वासको प्रस्ताव पास हुन दुई तिहाई मत आवश्यक पर्दछ । कडा सुरक्षा व्यवस्थाबीच विशेष साधारण सभा भएको थियो । एन्फा अध्यक्ष नेम्वाङको बर्खास्ती सम्बन्धि एकमात्र एजेण्डाको नियर्णका लागि विशेष साधारण सभा डाकिएको थियो ।

बिहान ८ बजेका लागि डाकिएको सभा झण्डै चार घण्टा ढिला सुरु भएको थियो । २०७९ असार ६ गते निर्वाचित एन्फा अध्यक्ष नेम्वाङले डेढ वर्ष नपुग्दै अविश्वासको प्रस्तावको सामना गर्नुपरेको थियो ।हेटौंडा–४ स्थित रोयल पार्टी प्यालेसमा उद्घाटन सत्र सुरु नगरी सभालाई अगाडि बढाइएको थियो।