काठमाडौं । काठमाडौं उपत्यकाको ट्राफिक व्यवस्थापन सुधारका लागि तत्काल नौ स्थानमा आकाशे पुल निर्माण गर्नुपर्ने भएको छ ।
उपत्यकामा दिनानुदिन बढ्दै गएको सवारी साधनले मानिसलाई सडकमा आवतजावत गर्न समस्या भएको भन्दै तत्काल नौ स्थानमा आकाशे पुल निर्माण गर्नुपर्ने भएको हो ।
नयाँबानेश्वर, पुतलीसडक, केशरमहल, कालिमाटी चोक, थापाथली चोक, कोटेश्वर चोक, चावहिल, गौशाला चोक र नारायणगोपाल चोकमा आकाशे पुल निर्माण गर्नुपर्ने भएको हो । यस्तै, लैनचौर, त्रिपुरेश्वर चोक, बालाजु चोक, माइतीघर, शङ्करदेव, बसुन्धरा चोक, ल्होत्से चोक, स्वयम्भू चोक र टेकुमा समेत आकाशेपुल आवश्यक रहेको छ ।
प्रहरी महानिरीक्षक सर्वेन्द्र खनालको उपस्थितिमा सोमबार र मंगलवार नेपाल पुलिस क्लबमा यातायात व्यवसायी तथा सरकारी तथा गैरसरकारी संस्थासँग उपत्यकाको ट्राफिक सुधारको बारेमा छलफल गरिएको थियो । छलफलमा ट्राफिक सुधारका लागि आगामी दिनमा चाल्नुपर्ने कदमको बारेमा समेत छलफल भएको थियो ।
महानगरीय ट्राफिक प्रहरी महाशाखाका प्रमुख वसन्तकुमार पन्त उपत्यकामा बढ्दै गएको सवारी साधनसँगै आकाशे पुलको आवश्यकता बढेर गएको बताए । ‘जथाभावी बाटो काट्दा दुर्घटना बढ्दै गएको छ, यसलाई रोक्न पनि आकाशे पुल आवश्यक छ’, उनले भने ।
महाशाखा प्रमुख पन्त उपत्यकाभित्रका महानगर तथा नगरपालिका र सडक विभागले आकाशे पुल निर्माणका लागि आ–आफ्नो योजना प्रस्तुत गरिसकेको भन्दै ती योजना चाँडै कार्यान्वयनमा आउने विश्वास व्यक्त गरे ।
हाल काठमाडौँ उपत्यकाको नयाँ बसपार्क, पुरानो बसपार्क, भोटाहिटी, जमल, वीरअस्पताल, सुन्धारा, पुल्चोक साथै नयाँ बनेका काभ्रे–कोटेश्वर सडक र कोटेश्वर–कलङ्की सडकमा समेत आकाशे पुल निर्माण भएको छ ।
नेपाल यातायात व्यवसायी राष्ट्रिय महासङ्घका महासचिव सरोज सिटौलाले उपत्यकाका धेरै स्थानमा आकाशे पुलको आवश्यकता रहेको बताए । ‘नयाँ बन्न लागेका पुल दिगो र टिकाउ खालको हुुुनुपर्छ’, उनले भने । पुल निर्माणसँगै उपत्यकाको सवारी दुर्घटनामा कमी आउने उनको भनाइ छ ।
कोटेश्वरदेखि कलङ्कीसम्म चीन सरकारले बनाएको नयाँबाटोमा दुर्घटना कम गर्न तथा जथाभावी बाटो काट्ने प्रवृत्ति रोक्न सडकको दायाँ बायाँ बार लगाउनुपर्ने आवश्यकता देखिएको महाशाखाले जनाएको छ ।
काठमाडौँ उपत्यकाभित्र ३ सय स्थानमा जेब्रा क्रसिङ र लेनलाई मर्मत गर्नुपर्ने महाशाखाले जनाएको छ । सिंहदरबारदेखि कमलपोखरीसम्मका २७ स्थान, थापाथलीदेखि कालीमाटीसम्मका २६ स्थान, जनसेवादेखि दरबारमार्गसम्म ४६ स्थान, गौशालादेखि चुच्चेपाटीसम्म २३ स्थान, कोटेश्वरदेखि पेप्सीकोलासम्म २८ स्थानमा जेब्रा क्रसिङ तथा लेन मर्मत गर्नुपर्ने भएको छ ।
त्यस्तै, जावलाखेलदेखि एकान्तकुना हुँदै शशिभवनसम्म ३० स्थान, ठिमी चोकदेखि सूर्यविनायक हुँदै कमलविनायकसम्म १९ स्थान, कौशलटारदेखि परीक्षा नियन्त्रण कार्यालयसम्म ३२ स्थान, सातदोबाटोदेखि महालक्ष्मीस्थानसम्म आठ स्थान, कलङ्कीदेखि थानकोटसम्म १५ स्थान, नयाँ बसपार्कदेखि बूढानीलकण्ठसम्म १३ स्थानमा जेब्रा क्रसिङ र लेनलाई मर्मत गर्नुपर्ने भएको छ ।
यातायात व्यवस्था विभागका अनुसार हाल देशभर ३२ लाख बढी सवारी साधन सञ्चालनमा रहेका छन् । तीमध्ये ११ लाख हाराहारीमा सवारी साधन काठमाडौँ उपत्यकामा सञ्चालित छन् ।
यो खबर पढेर तपाईलाई कस्तो महसुस भयो ?
प्रतिक्रिया