दाउफिन्सलाई दुहबी गोल्डकपको उपाधि

काठमाडौं । दाउफिन्स क्लबले तेस्रो मनमोहन स्मृति दुहबी गोल्डकप फुटबल प्रतियोगिताको उपाधि जितेको छ । 

शनिवार सम्पन्न भएको फायनल खेलमा दाउफिन्स क्लबले विभागिय क्लब त्रिभुवन आर्मी क्लबलाई सडेन डेथमा ८-७ गोल अन्तरले पराजित गर्दै उपाधि आफ्नो पक्षमा पारेको हो । प्रतिस्पर्धात्मक बनेको खेलको निर्धारित समयसम्म दुवै क्लबले गोलरहित बराबरी खेलेको थियो ।

दाउफिन्सले जितेको यो पाँचौ उपाधि हो । यसअघि दाउफिन्सले मनकामना केबल कार पोखरा कप, बुढासुब्बा गोल्डकप, तिलोतमा गोल्डकप र माइभ्याली गोल्डकप फुटबलको उपाधि जितेको थियो ।

यो उपाधिसँगै दाउफिन्सले ३ लाख रुपैयाँ पुरस्कार पनि जितेको छ ।