न्यूजिल्यान्डमा सांसदले नाचेर भाषण गरेपछि… (भिडियोसहित)

काठमाडौं । हाना रहिती माइपे–क्लार्क न्यूजिल्यान्डकी अहिलेसम्मकै कान्छी सांसद हुन् । यतिबेला उनको एउटा भिडियो सामाजिक सञ्जालमा भाइरल बनिरहेको छ ।

भाइरल हुनुको कारण चाहिँ संसदमा उनले माओरी संस्कृतिको नृत्य हाका प्रस्तुती गर्दै भाषण दिनु हो । हाका युद्धगीत हो । यसलाई पूरै ताकत र भाव भंगिमाको साथमा प्रस्तुत गरिन्छ ।

संसदमा माइपे–क्लार्कले माओरीहरुलाई समर्पित एउटा शक्तिशाली भाषण दिँदै पारम्परिक ‘वार क्राई’ प्रदर्शन गरेकी थिइन् । संसदमा उनले वार क्राई प्रदर्शन गर्दै गर्दा ठूलो संख्यामा सांसदहरुले उनलाई पछ्याए । हाका राम्रोसँग नबुझ्नेहरुको भाव भने नबुझिने खालको थियो । भिडियोमा माइपे–क्लार्कको अनुहार डर लाग्दो देखिएको थियो । भाइरल भिडियो गएको महिनाको हो ।

कयौं मान्छेहरुले भिडियोलाई सामाजिक सञ्जालमा शेयर गरिरहेका छन् । हाका नृत्य जनजातीलाई स्वागत गर्ने पारम्परिक तरिका हो । तर यो युद्धमा जान लागेका योद्धाहरुलाई उत्साहित गर्न पनि गरिन्छ ।

१७० वर्षको इतिहासमा २१ वर्षिय माइपे–क्लार्क न्यूजिल्यान्डकी सबैभन्दा कान्छी सांसद हुन् । न्यूजिल्यान्डमा सबैभन्दा लामो समय सेवा गरेकी महिला सांसद नानिया महुतालाई हराएर उनी सांसद बनेकी थिइन् ।