नेपालगञ्ज । आठौँ राष्ट्रिय खेलकुद प्रतियोगिताको समापन उपराष्ट्रपति नन्दबहादुर पुनले गर्ने भएका छन् ।
प्रतियोगितको भोलि ‘बुधवार’ भव्य समारोहकाबीच नेपालगञ्जस्थित महेन्द्र रङ्गशालामा उपराष्ट्रपति पुनले समापन गर्ने प्रदेश नं ५ का प्रदेश खेलकुद विकास समितिका अध्यक्ष भीम वलीले जानकारी दिए ।
उनका अनुसार समापन समारोहमा फुटबल प्रतियोगितको फाइनल खेल मात्र हुनेछ । फुटबल प्रतियोगितको फाइनल खेलको शुभारम्भ उपराष्ट्रपति पुनले गर्ने कार्यक्रम रहेको छ । फाइनल खेल भोलि दिउँसो साढे ३ बजे हुनेछ । अहिले फुटबलका सेमिफाइनलका खेल भइरहेका छन् ।
सेमिफाइनलमा प्रदेश नं ५, नेपाल आर्मी क्लब, सशस्त्र प्रहरी बल ‘एपिएफ’ र नेपाल पुलिस क्लब पुगेका छन् ।
गत चैत २७ गतेबाट खेल शुरु गरिए पनि प्रतियोगिताको औपचारिक उद्घाटन भने वैशाख ५ गते राष्ट्रपति विद्यादेवी भण्डारीले नेपालगञ्ज रङ्गशालामा भव्य समारोहका बीच गरेको थियो ।
‘आठौँ राष्ट्रिय खेलकुद, हाम्रै प्रदेशमा, पसिना र पौरख आफ्नै देशमा’ भन्ने मूल नाराका साथ भइरहेको प्रतियोगितामा करीब पाँच हजार खेलाडी सहभागी भएका छन् । बाँकेसहित बर्दिया, दाङ, कपिलवस्तु, रुपन्देही र केही प्रतियोगिता काठमाडौं, ललितपुर र पोखरामा ३५ खेल सम्पन्न भएका छन् ।
यो खबर पढेर तपाईलाई कस्तो महसुस भयो ?
प्रतिक्रिया