सुस्मिताको नयाँ कीर्तिमान

बाँके । आठौँ राष्ट्रिय खेलकुदअन्तर्गत सुटिङतर्फ महिला १० मिटर एयर राइफलमा प्रदेश ३ की सुस्मिता नेपालले नयाँ राष्ट्रिय कीर्तिमान बनाएकी छिन् । 

स्नेहाले २ सय ४० पूर्णाङकमा २ सय ३४ अंक जोड्दै स्नेहा राज्यलक्ष्मी राणाले राखेप च्याम्पियनसिपमा बनाएको २ सय ३३ अंकलाई भंग गर्दै कीर्तिमानी स्वर्ण जितिन् । २ सय २७ अंकमा आर्मीकी कल्पना परियार दोश्रो तथा २ सय ३ अंकमा प्रहरीकी अस्मिता राई तेश्रो भइन् ।

नेपालगन्ज रंगशालास्थित सुटिङ रेन्जमा भएको प्रतियोगिताअन्तर्गत सोही स्पर्धाको पुरुषमा प्रदेश ५ का अर्नव घिमिरे पहिलो भए । उनले कुल २ सय ४० अंकमा २ सय १६ अंक जोडे । २ सय १४ अंक जोडेका प्रहरीका हरिबहादुर थापा दोश्रो तथा १९६ अंक जोडेका आर्मीका सुशे चौधरी तेश्रो भए ।

विजेतालाई राष्ट्रिय खेलकुद परिषद्का सदस्य–सचिव केशवकुमार विष्टलगायतले एक कार्यक्रमबीच पुरस्कृत गरे ।