अवैध लागुऔषधसहित विभिन्न स्थानबाट ५ जना पक्राउ

काठमाडौं । अवैध लागुऔषधसहित विभिन्न स्थानबाट ५ जनालाई प्रहरीले पक्राउ गरेको छ । कैलालीको धनगढी उपमहानगरपालिका-८ धनगढीगाउँबाट अवैध लागुऔषध खैरो हेरोईन जस्तो देखिने पदार्थ ६ सय ५० मिलिग्रामसहित सोही उपमहानगरपालिका-१ बसन्तटोल बस्ने १९ वर्षीय आदित चौधरीलाई गएराति प्रहरीले पक्राउ गरेको हो । जिल्ला प्रहरी कार्यालय कैलालीबाट खटिएको प्रहरीले उनलाई उक्त पदार्थसहित पक्राउ गरेको हो ।

यसैगरी कैलालीको बर्दगोरिया गाउँपालिका-१ झगडपुबाट अवैध लागुऔषध खैरो हेरोईन जस्तो देखिने पदार्थ १ ग्राम ६ सय ५० मिलिग्रामसहित २ जनालाई बिहीबार बिहान प्रहरीले पक्राउ गरेको छ । पक्राउ पर्नेहरूमा सोही ठाउँ बस्ने २८ वर्षीय अनिल विक र २७ वर्षीय सन्तोष बिक रहेका छन् । ईलाका प्रहरी कार्यालय सडकपुरबाट खटिएको प्रहरीले उनीहरूलाई उक्त पदार्थसहित पक्राउ गरेको हो ।

धनुषाको लक्ष्मीनियाँ गाउँपालिका-४ सपही बस्ने ४२ वर्षीय सिकिन्द्र साहलाई अवैध लागुऔषध गाँजा २ किलो ५ ग्रामसहित बिहीबार बिहान प्रहरीले पक्राउ गरेको छ । प्रहरी चौकी लक्ष्मीनियाबाट खटिएको प्रहरीले उनको घर तलासी गर्दा उक्त गाँजा फेला पारी उनलाई पक्राउ गरेको हो ।

उदयपुरको त्रियुगा नगरपालिका-४ बगाह शान्ती चोक बस्ने ३१ वर्षीय किरण अधिकारीलाई नियन्त्रित लागूऔषध फेनारगन ५ एम्पुल, डाईजेपाम ५ एम्पुल, ब्रुपिनोर्फिन ५ एम्पुल, नाईट्रोजन ३ ट्याब्लेट र सिरिन्स ३ थानसहित बिहीबार बिहान प्रहरीले पक्राउ गरेको छ । अस्थायी प्रहरी पोष्ट बगाहबाट खटिएको प्रहरीले घर तलासी गर्ने क्रममा जुत्ताभित्र लुकाई राखेको उक्त लागुऔषध फेला पारी पक्राउ गरेको हो । यस सम्बन्धमा आवश्यक अनुसन्धान गरिरहेको प्रहरीले जनाएको छ ।