राष्ट्र बैंकले भन्यो–‘हल्लाको पछि नलागौँ, सर्वसाधारणको निक्षेप पूर्ण रुपमा सुरक्षित छ’

काठमाडौं । नेपाल राष्ट्र बैंकले बैंक तथा वित्तीय संस्थामा सर्वसाधारणको निक्षेप सुरक्षित रहेको बताएको छ ।

केही व्यक्ति तथा समूहले बैंकमा निक्षेप जम्मा गरेका सर्वसाधारणको निक्षेप डुब्न लागेको भन्दै अफवाह फैलाएको भन्दै हल्लाको पछि नलाग्न आग्रह गरेको हो ।

बैंक तथा वित्तीय संस्थाप्रति आक्रामक बन्दै आएका मेडिकल व्यवसायी दुर्गा प्रसाईंले फागुन १ गते काठमाडौंमा कार्यक्रम आयोजना गरि नामै तोकेर केही बैंकमा रहेको निक्षेप डुब्न लागेको दाबी गरेका थिए । साथै केही बैंक तथा वित्तीय संस्थाका बारेमा नकारात्मक समाचार आएपछि राष्ट्र बैंकले त्यसको खण्डन गर्दै त्यसबारेमा सचेत गराएको हो ।

‘बैंक तथा वित्तीय संस्था सञ्चालनको पछिल्लो अवस्था हेर्दा समग्र बैंकिङ क्षेत्र सक्षम र सबल रहेको र यस बैंकले बैंक तथा वित्तीय संस्थाको कारोबारको नियमित निगरानी गरिरहेकोले सर्वसाधारणको निक्षेप पूर्ण रुपमा सुरक्षित रहेको ब्यहोरा अनुरोध छ ।’ राष्ट्र बैंकले विज्ञप्ति जारी गर्दै भनेको छ, ‘बैंकिङ जस्तो सम्वेदनशील क्षेत्रप्रति सर्वसाधारणलाई भ्रमित गर्न दुुष्प्रचार गर्ने कार्यको पछाडी नलागी सम्बद्ध लगानीकर्ता, निक्षेपकर्ता, ग्राहक तथा सरोकारवालालाई ढुक्कसँग नियमित रुपमा बैंकिङ कारोबार गर्न नेपाल राष्ट्र बैंक हार्दिक अनुरोध गर्दछ ।’