पाकिस्तानमा तीन तले भवन भत्किँदा नौ जनाको मृत्यु, दुईजना घाइते

काठमाडौं । पाकिस्तानको पञ्जाब प्रान्तको मुल्तानमा मंगलबार एउटा ठूलो दुर्घटना भएको छ । मुल्तानमा तीन तले आवासीय भवन अचानक भत्किंदा कम्तीमा नौ जनाको मृत्यु भएको छ ।

यसैबीच अन्य दुई जना घाइते भएको बताइएको छ । मृत्यु हुनेमा चार जना एकै परिवारका थिए ।

पाकीस्तानी सञ्चारमाध्यम अनुसार अचानक भत्किएपछि पूरै घर भग्नावशेषमा परिणत भएको थियो । जसका कारण वरपरका घरमा समेत क्षति पुगेको छ ।

पाकिस्तानमा भवन भत्किनु कुनै नौलो कुरा भने होइन । सस्तो सामग्री र सुरक्षा दिशानिर्देशको अभावमा कमजोर घरहरू भत्किने घटनाहरू विगतमा धेरै भइरहेका छन्।

यसअघि जुन २०२० मा पाकिस्तानको सबैभन्दा ठूलो शहर कराँचीमा एउटा अपार्टमेन्ट भवन भत्किँदा २२ जनाको मृत्यु भएको थियो।