काठमाडौं । मकवानपुर र कैलालीबाट लागुऔषधसहित तीनजना पक्राउ परेका छन् ।
मकवानपुरको हेटौंडा उपमहानगरपालिका–१५ रातोमाटेबाट अवैध लागुऔषध गाँजा जस्तो देखिने वस्तु करिब २ किलो ५ सय ग्रामसहित दुईजना पक्राउ परेका हुन् । राक्सिराङ गाउँपालिका–१ बस्ने २८ वर्षीय जीवन लामा समेत २ जनालाई शुक्रबार बिहान प्रहरीले पक्राउ गरेको हो ।
प्रहरी चौकी रातोमाटेबाट खटिएको प्रहरी टोलीले हेटौंडाबाट पथलैयातर्फ जाँदै गरेको बा.३ ख ८३८२ नम्बरको बसलाई जाँच गर्ने क्रममा बसमा सवार उनीहरूलाई उक्त लागुऔषधसहित पक्राउ गरेको हो ।
यसैगरी कैलालीको धनगढी उपमहानगरपालिका–३ भन्सार ब्यारेलबाट अवैध लागुऔषध ब्राउनसुगर जस्तो देखिने पदार्थ १ ग्राम २० मिलिग्रामसहित एकजना पक्राउ परेका छन् । सोही उपमहानगरपालिका–३ बोराडाडी बस्ने १९ वर्षीय दिपेश अवस्थीलाई शुक्रबार बिहान प्रहरीले पक्राउ गरेको हो ।
वडा प्रहरी कार्यालय धनगढी र प्रहरी चौकी त्रिनगरबाट खटिएको संयुक्त प्रहरी टोलीले उनलाई उक्त पदार्थसहित पक्राउ गरेको हो ।
यस सम्बन्धमा प्रहरीले आवश्यक अनुसन्धान गरिरहेको छ ।
यो खबर पढेर तपाईलाई कस्तो महसुस भयो ?
प्रतिक्रिया