सिमलताल बस दुर्घटना : हालसम्म १८ शव भेटियो, चारको सनाखत हुन बाँकी

काठमाडौं। गत असार २८ गते चितवनको भरतपुर महानगरपालिका–२९ सिमलतालमा भएको बस दुर्घटनामा बेपत्तामध्ये हालसम्म १८ जनाको शव फेला परेको छ ।

सशस्त्र प्रहरीले उपलब्ध गराएको तथ्यांक अनुसार बुधबार साँझसम्म बेपत्तामध्ये १८ यात्रुको शव फेला परेको र त्यसमध्ये ४ जनाको शव सनाखत हुन बाँकी रहेको छ । भेटिएकामध्ये हालसम्म १४ जनाको शव सनाखत भएको छ ।

शुक्रबार बिहान सिमलतालमा दुई बस पहिरोमा परी त्रिशूली नदीमा बेपत्ता भएको थियो । दुई बसमा ६५ यात्रु रहेका थिए ।

वीरगन्जबाट काठमाडौंका लागि छुटेको बागमती प्रदेश ०३–००६ ख १५१६ नम्बरको एन्जल डिलक्स बसमा ३८ जना सवार थिए । काठमाडौंबाट गौरका लागि छुटेको बागमती प्रदेश ०३–००१ ख २४९५ नम्बरको गणपति डिलक्स बसमा २७ जना सवार थिए ।

त्यसपछि पनि निरन्तर वर्षाका कारण नदी धमिलो रहेका खोजी कार्यका लागि कठिनाइ भइरहेको छ । हाल नेपाली सेना, सशस्त्र प्रहरी र नेपाल प्रहरीले गोताखोर प्रयोग गरी खोजी कार्यलाई तीव्रता दिइरहेका छन् ।