काठमाडौं । चितवनको भरतपुर महानगरपालिका–२९ स्थित सिमलतालमा भएको बस दुर्घटनामा हराइरहेका मध्ये हालसम्म २३ जनाको शव फेला परेको छ ।
२ वटा बस पहिरोमा परी त्रिशूली नदीमा बेपत्ता भएको एक हप्ता बितिसक्दा पनि हालसम्म २३ जनाको मात्रै शव फेला परेको हो ।
सशस्त्र प्रहरीले उपलब्ध गराएको तथ्यांक अनुसार फेला परेकामध्ये ८ पुरुष र एक महिलाको भने शव सनाखत हुन बाँकी रहेको छ ।
सिमलताल दुर्घटनामा चितवन प्रशासनको नयाँ अपडेट : ५४ होइन दुई बसमा थिए ६५ यात्रु
नेपाल प्रहरी, सशस्त्र प्रहरी र नेपाली सेनाको गोताखोरको टोली परिचालन गरेर खोजी कार्य भइरहेको छ ।
गत शुक्रबार बिहान सिमलतालमा दुई बस पहिरोमा परी त्रिशूली नदीमा बेपत्ता भएको थियो । दुई बसमा ६५ यात्रु रहेका थिए ।
वीरगन्जबाट काठमाडौंका लागि छुटेको बागमती प्रदेश ०३–००६ ख १५१६ नम्बरको एन्जल डिलक्स बसमा ३८ जना सवार थिए । काठमाडौंबाट गौरका लागि छुटेको बागमती प्रदेश ०३–००१ ख २४९५ नम्बरको गणपति डिलक्स बसमा २७ जना सवार थिए ।
त्यसपछि पनि निरन्तर वर्षाका कारण नदी धमिलो रहेका खोजी कार्यका लागि कठिनाइ भइरहेको छ ।
यो खबर पढेर तपाईलाई कस्तो महसुस भयो ?
प्रतिक्रिया