वैदेशिक रोजगारमा पठाइदिन्छु भन्दै ठगी गर्ने व्यक्ति पक्राउ

काठमाडौं । वैदेशिक रोजगारमा क्रोएशिया पठाइदिन्छु भन्दै ठगी गरेको अभियगाम एकजना पक्राउ परेका छन् । पक्राउ पर्नेमा रौतहट माधवनारायण नगरपालिका–३ घर भई हाल ललितपुर महानगरपालिका–२ सानेपा बस्ने २७ वर्षीय चन्दन कुमार जैसवाल रहेका छन् ।

काठमाडौं उपत्यका अपराध अनुसन्धान कार्यालय टेकुबाट खटिएको प्रहरी टोलीले जैसवाललाई काठमाडौं महानगरपालिका–१२ पचली भैरवबाट शुक्रबार पक्राउ गरेको हो ।

जैसवालले आकर्षक तलबको प्रलोभनमा पारी क्रोएशिया पठाइदिन्छु भनी ४ जना पीडितहरूबाट ५ लाख ८४ हजार रूपैयाँ लिई सम्पर्क विहीन भएको प्रहरीको अनुसन्धानको क्रममा खुल्न आएको छ ।

पक्राउ पश्चात उनलाई आवश्यक अनुसन्धान तथा कारबाहीको लागि वैदेशिक रोजगार विभाग ताहाचल पठाइएको प्रहरीले जनाएको छ ।