लागुऔषधसहित ५ जना पक्राउ

काठमाडौं । छुट्टाछुट्टै स्थानबाट अवैध लागुऔषधसहित ५ जना पक्राउ परेका छन् ।
काठमाडौंको चन्द्रागिरी नगरपालिका–२ नागढुङ्गाबाट अवैध लागुऔषध खैरो हेरोइन जस्तो देखिने पदार्थ ८ ग्रामसहित एकजना पक्राउ परेका हुन् । पक्राउ पर्नेमा कैलाली गौरीगंगा नगरपालिका–२ बस्ने २१ वर्षीय गणेश सिघाल रहेका छन् । प्रहरी वृत्त थानकोट र लागुऔषध नियन्त्रण ब्यूरो शाखा कार्यालय नागढुङ्गाबाट खटिएको प्रहरीले टोलीले धनगढीबाट काठमाडौंतर्फ आउँदै गरेको ना.८ ख ६९४८ नम्बरको बसलाई जाँच गर्ने क्रममा बसमा सवार सिघाललाई उक्त पदार्थसहित शनिबार दिउँसो पक्राउ गरेको हो ।

यसैगरी झापाको भद्रपुर नगरपालिका–५ मेचीपुलबाट अवैध लागुऔषध गाँजा ३२ ग्राम ५ सय मिलिग्राम र अवैध लागुऔषध ब्राउनसुगर जस्तो देखिने पदार्थ ८ सय ४० मिलिग्राम सहित २ जनालाई शुक्रबार दिउँसो प्रहरीले पक्राउ गरेको छ । पक्राउ पर्नेहरूमा भद्रपुर नगरपालिका–९ बस्ने २१ वर्षीय राज कुमार राजवंशी र भारत सिक्किम राज्य नाम्ची घर बताउने २७ वर्षीय सन्तोष राई रहेका छन् । मेचीपुल बिटबाट खटिएको प्रहरी टोलीले उनीहरूलाई उक्त लागुऔषध सहित पक्राउ गरेको हो ।

त्यस्तैगरी भोजपुरको भोजपुर नगरपालिका–७ भोजपुर बजारबाट नियन्त्रित लागुऔषध ट्रामाडोल १८ ट्याब्लेट र कोलिवान १६ ट्याब्लेट सहित २ जनालाई शुक्रबार दिउँसो प्रहरीले पक्राउ गरेको छ । पक्राउ पर्नेहरूमा भोजपुर नगरपालिका-९ बस्ने २० वर्षीय अर्पण राई र २० वर्षीय रेन्जी शेर्पा रहेका छन् । जिल्ला प्रहरी कार्यालय भोजपुरबाट खटिएको प्रहरी टोलीले बा.प्र.३ –००५ प ५३५५ नम्बरको मोटरसाइकलमा सवार उनीहरूलाई उक्त लागुऔषध सहित पक्राउ गरेको हो ।

यस सम्बन्धमा प्रहरीले आवश्यक अनुसन्धान गरिरहेको छ ।