सवारी दुर्घटनामा तीन जनाको मृत्यु

काठमाडौं । छुट्टाछुट्टै स्थानमा सवारी दुर्घटना हुँदा तीन जनाको मृत्यु भएको छ । सुनसरीको भोक्राहानरसिंह गाउँपालिका–६ फुल चोकस्थित सडकमा प्रदेश १–०२– ००१ ख ८१५६ नम्बरको ट्रकले को. २४ प ८४७ नम्बरको मोटरसाइकललाई शुक्रबार
राति ठक्कर दिँदा मोटरसाइकलमा सवार एक जनाको मृत्यु भएको छ । मृत्यु हुनेमा सोही ठाउँ बस्ने ३५ वर्षीय लक्ष्मण उराव रहेका छन् । दुर्घटनाबाट गम्भीर घाइते भएका उनको सप्तकोशी न्यूरो अस्पताल सुनसरीमा उपचारको क्रममा मृत्यु भएको हो । साथै दुर्घटनामा घाइते भएका मोटरसाइकलमा सवार अन्य २ जनाको सोही अस्पतालमा उपचार भइरहेको छ । हाल फरार ट्रक चालकको प्रहरीले खोजी गरिरहेको छ ।

यसैगरी काभ्रेको धुलिखेल नगरपालिका–३ बाँसघारीस्थित सडकमा बनेपाबाट धुलिखेलतर्फ जाँदै गरेको बा.प्र.०१–००४ क ०१३० नम्बरको मिनि टिपरको ठक्करबाट पैदलयात्रीको मृत्यु भएको छ । मृत्यु हुनेमा हाल नाम, थर, वतन नखुलेका अन्दाजी ६० वर्षीय पुरूष रहेका छन् । दुर्घटनामा गम्भीर घाइते भएका उनको धुलिखेल अस्पतालमा उपचारको क्रममा शुक्रबार राति मृत्यु भएको हो । टिपर चालकलाई प्रहरीले नियन्त्रणमा लिएको छ ।

त्यसैगरी रूपन्देहीको शुद्धोधन गाउँपालिका–३ सखुवानीमा लु.२१ प ८६७२ नम्बरको स्कुटरलाई बा.२९ प २२०० नम्बरको मोटरसाइकलले ठक्कर दिँदा स्कुटरमा सवार एक जनाको मृत्यु भएको छ । मृत्यु हुनेमा सोही ठाउँ बस्ने ६२ वर्षीया दिल कुमारी जिसी रहेकी छन् । दुर्घटनामा गम्भीर घाइते भएकी उनको क्रिमशन हस्पिटल मणीग्राममा उपचारको क्रममा शनिबार बिहान मृत्यु भएको हो । मोटरसाइकल चालकलाई प्रहरीले नियन्त्रणमा लिएको छ ।

दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।