चितवनमा मानसिक रोगी महिलाको सामूहिक बलात्कार, तीनजना विद्यार्थी पक्राउ

काठमाडौं । चितवनमा एक महिलामाथि तीनजना विद्यार्थीले सामूहिक बलात्कार गरेको प्रहरीले जनाएको छ । शनिबार राति एउटा घरमा खाना खाएर सुत्नका लागि अर्काे घर जाँदै गरेकी चितवनको माढी नगरपालिका–६ की ३७ वर्षीया महिलामाथि सामूहिक बलात्कार भएको हो ।

जिल्ला प्रहरी कार्यालय चितवनका प्रवक्ता डिएसपी भेषराज रिजालले भने, ‘मानसिक रोगी ती महिला घर फर्कने क्रममा अर्कै बाटो लागिछन् । त्यही बेला बाटोमा तीन जना केटाहरूले भेटेछन् । त्यसपछि कोठामा लगेर सामूहिक बलात्कार गरेको भन्ने छ ।’ १७, १८ र २३ वर्षका ती तीनजना विद्यार्थी चितवनको एक प्राविधिक शिक्षालयमा अध्ययनरत छन् । उनीहरुले साथीको जन्मदिन मनाएर फर्कँदै गर्दा बाटोमा ती महिलालाई भेटेका थिए । उनीहरूलाई पक्राउ गरी बिहीबार जिल्ला अदालत चितवनबाट ५ दिनको म्याद थप गरी अनुसन्धान अगाडि बढाइएको डिएसपी रिजालले जानकारी दिए ।