रामेछाप । खाँडादेवी गाउँपालिकामा वर्षाको कारण आएको बाढीपहिरोले अधिकांश स्थानीय सडक बिगारेको छ ।
बाढीपहिरोले सडक बिगारेर यातायातका साधन ठप्प भएपछि सडक खुलाउन स्थानीय तहका जनप्रतिनिधिहरू लागेका छन् । बाढीका कारण अवरुद्ध भएका खाँडादेवी–३ का विभिन्न सडक खुलाउने कार्य जारी छ ।
सो क्रममा सित्खा–आँपचौर–रायगाउँबाट खाँडादेवी मन्दिर हुँदै जाने सडकका विभिन्न अवरोध हटाएर खुल्ला गरिएका छ । कतिपय स्थानमा मान्छे र पशुपन्छी समेत हिँड्न नसक्ने गरी बिग्रिएको सडक जेसीबी लगाएर मर्मत गरिएको वडाध्यक्ष पुष्करकुमार कार्कीले जानकारी दिए ।
यसैगरी भिरपानीबाट मझुवा जाने सडकको अवरोध पनि हटाउने काम भएको उनले बताए । वडाका अधिकांश सडक बढी पहिरोले बिगारेकोले क्रमशः अवरोध हटाएर सडक खुलाउँदै लैजाने कार्कीले जानकारी दिए ।
बाढी पहिरोले क्षति पुर्याएको वडा नं ८ र ९ का सडक पनि मर्मत भइरहेका छन् । ती सडकमा बाढी पहिरोले पुर्याएको अवरोध हटाउन वडाध्यक्ष लगायत स्थानीय तहका जनप्रतिनिधिहरू लागिरहेका छन् ।
सो गाउँपालिकाका नौवटै वडाका सडकहरू बाढी पहिरोको कारण अवरुद्ध भएका छन् । अवरुद्ध भएका सबै सडकहरू क्रमशः खुलाइने गाउँपालिका अध्यक्ष ज्ञानकुमार श्रेष्ठले जानकारी दिए । ‘बाटो सबै खुलाउने हो, तर ठुलो पानी आयो भने फेरि उस्तै हुने सम्भावना छ, तथापि तत्कालका लागि सबै सडक यातायात साधन चल्न सक्ने गरी मर्मत गर्छौ’, उनले भने ।
यो खबर पढेर तपाईलाई कस्तो महसुस भयो ?
प्रतिक्रिया