कोशी अस्पतालबाट फरार कैदी पक्राउ

काठमाडौं । विराटनगरको कोशी अस्पतालबाट फरार भएका कैदी पक्राउ परेका छन् ।

साउन १७ गते बिहान अस्पतालबाट फरार भएका विराटनगर महानगरपालिका–८ घर भएका २४ वर्षीय मोहमद अहमदलाई इलाका प्रहरी कार्यालय रानीबाट खटिएको प्रहरी टोलीले तारेगाबाट बिहीबार पक्राउ गरेको हो ।

जबरजस्ती करणी मुद्दामा दोषी ठहर भई जिल्ला कारागार मोरङमा कैद सजाय भुक्तान गरिरहेका अहमद साउन १७ गते बिहान अस्पतालबाट फरार भएका थिए । अहमदलाई उपचारका लागि साउन १५ गते कोशी अस्पताल भर्ना गरिएको थियो।

अहमदलाई जिल्ला अदालत मोरङले २०७९ फागुन २९ गते १२ वर्ष कैद र ५ लाख जरिवाना हुने फैसला गरेको थियो ।