काठमाडौं । काठमाडौं महानगरपालिकाकी उपमेयर सुनिता डंगोलले युवाहरु विदेशिने संख्यासँगै स्वदेश फर्किनेको संख्या पनि उत्तिकै बढेको बताएकी छन् ।
आज (सोमबार) अन्तर्राष्ट्रिय युवा दिवसको अवसरमा बोल्दै उनले युवाहरुका समसामयिक सवाल र सम्भावनाका बारेमा छलफल गर्नुपर्ने बताएकी हुन् ।
उनले भनिन्, ‘विदेशिने युवाहरुको जमात बढ्दो छ । सँगसँगै विदेशबाट स्वदेश फर्किने युवाहरुको जमात पनि बाक्लो छ । युवाहरु विदेशबाट फर्किँदा पुँजी मात्र फर्किँदैन उनीहरुले सिकेका सीप, प्रविधि र अनुभव पनि सँगै जोडिएर आउँछन् ।’
साथै उनले युवाहरुलाई उद्यमशिलतासँग जोड्नुपर्ने बताइन् । उनले युवाहरुको लागि व्यवहारिक योजनाहरु पनि ल्याउनुपर्ने बताइन् ।
उनले विदेश जाने सोच एउटा विद्यार्थीको मात्र नभएर परिवार, समाज सबैको सपना बन्दै गइरहेको बताइन् ।
उनले भनिन्, ‘धेरै जना युवाहरु उच्च शिक्षाको लागि विदेश जाने सपना देख्छन्, तर पछिल्लो समय यो सपना युवाको मात्र होइन एउटा परिवार, समाजको पनि सपना भैइसकेको छ । त्यसैले यस्ता क्रियाकलापलाई हामीले रोक्न जरुरी छ ।’
यो खबर पढेर तपाईलाई कस्तो महसुस भयो ?
प्रतिक्रिया