सरकारले भ्रष्टाचार नियन्त्रणका नाममा स्टन्टबाजी गर्दैन : प्रधानमन्त्री

काठमाडौं । प्रधानमन्त्री केपी शर्मा ओलीले अहिलेको सरकार भ्रष्टाचार नियन्त्रणका नाममा स्टन्टबाजी गर्न र भ्रष्टाचार छोप्ने काममा नलाग्ने दाबी गरेका छन् । 

आइतबार पार्टी केन्द्रीय कार्यालय च्यासलमा आयोजित एमालेनिकट नेपाल खेलकुद महासंघ केन्द्रीय कमिटीको तेस्रो बैठकमा बोल्दै उनले सरकार भ्रष्टाचारका घटना खोजविन गर्ने र कारबाही गर्ने कामको लागि बनेको भन्दै सरकारले भ्रष्टाचारप्रति शून्य सहनशीलता राख्ने बताए ।

उनले भने, ‘अहिलेको सरकार भ्रष्टचार नियन्त्रणका लागि बनेको हो । भ्रष्टाचार नियन्त्रणका नाममा स्टन्टबाजी गर्ने र भ्रष्टाचार छोप्ने काम गर्नका लागि होइन । भ्रष्टाचार खोजविन र कारबाही गर्ने कामको लागि बनेको सरकारले भ्रष्टाचारप्रति शून्य सहनशीलता राख्छ । समय क्रममा व्यवहारमा देखिँदै जान्छ ।’

प्रधानमन्त्री ओलीले न्याय र कानुन सबैका लागि भएकाले अनुहार हेरेर कुनै पनि व्यवहार नगर्ने बताए । 

उनले थपे, ‘न्याय सबैको लागि र कानुन सबैका लागि हो । अनुहार र मान्छेको मुख हेरेर कुनै पनि व्यवहार गरिँदैन । कानुनले व्यवहार गर्छ । हामी एउटा सुशासनयुक्त, समृद्ध, आधुनिक, शान्तिपूर्ण सुखी नेपाल र आनन्दको नेपाल बनाउन चाहन्छौँ ।’

उनले जो भ्रष्ट छ उसले भ्रष्टाचार विरोधी नाराको नाटक गरेर जनता अल्मल्याउने काम गरेको बताए । 

उनले भने,‘ जो भ्रष्ट छ उसले भ्रष्टाचार विरोधी नाराको नाटक गरेर जनता अल्मल्याउँछ । जो भ्रष्टाचार विरोधी छ उसलाई आरोप लगाएर तथानाम बोलेर बदनाम गर्न खोजिन्छ । यस्ता तत्त्वहरू छन् । तीनलाई देशको माया छैन ।’