सुर्खेतमा सवारी दुर्घटना हुँदा गाउँपालिका उपाध्यक्षको निधन, अन्य २३ घाइते

सुर्खेत । हुम्लाको सर्केगाड गाउँपालिकाका उपाध्यक्ष चन्द्रसिंह कार्कीको सवारी दुर्घटनामा परेर निधन भएको छ । सुर्खेतबाट नेपालगन्ज जाँदै गर्दा भेरीगंगा नगरपालिका–५ मा सोमबार दिउँसो भएको सवारी दुर्घटनामा उपाध्यक्ष कार्कीको मृत्यु भएको हो ।

जिल्ला प्रहरी कार्यालय सुर्खेतका अनुसार, कर्णाली प्रदेश ०२००१ ख १०११ नम्बरको फोर्स गाडी सडक छेउको नालामा खसेको थियो । नालामा खस्दा अन्य २३ जना घाइते भएका थिए । जिल्ला प्रहरी कार्यालय सुर्खेतका डीएसपी वीरेन्द्र विश्वकर्माका अनुसार, दुर्घटनामा परेर उपाध्यक्ष कार्की गम्भीर घाइते भएका थिए ।

उनको नेपालगन्ज मेडिकल कलेज भेरी अस्पतालमा उपचारको क्रममा सोमबार राति पौने २ बजे निधन भएको हो । ३९ वर्षीय कार्की माओवादी केन्द्रको तर्फबाट हुम्लाको सर्केगाड गाउँपालिकामा उपाध्यक्षमा निर्वाचित भएका थिए । माओवादी केन्द्रको कर्णाली प्रदेश समिति सचिवालय सदस्यसमेत रहेका कार्की कर्णाली प्रदेशसभा सदस्य जुम्कीत लामाका पति हुन् ।