महिला भलिबल टिम ‘ललितपुर क्वीन्स’को लोगो सार्वजनिक

काठमाडौं । आगामी असोज १४ गतेदेखि आयोजना हुने एभरेस्ट महिला भलिबल लिगमा सहभागी हुने टोली ललितपुर क्वीन्सले आफ्नो लोगो सार्वजनिक गरेको छ । रुप्से स्पोर्टस्ले आइतबार क्वीन्सको लोगो सार्वजनिक गरेको हो ।

रुप्से स्पोर्ट्सको स्वामित्वमा रहेको ललितपुर क्वीन्सले आफ्नो लोगो सार्वजनिक गर्दै टोलीमा सहभागी खेलाडीहरुको नामसमेत सार्वजनिक गरेको छ ।

नेपालमा पहिलोपटक आयोजना हुन लागेको महिलाहरुको फ्रेन्चाइज भलिबल लीग इडब्लुभिएलमा उच्च प्रदर्शन गर्ने गरी तयारी सुरु गरेको ललितपुर क्वीन्सले जनाएको छ ।

ललितपुर क्वीन्स नेपाली राष्ट्रिय भलिबल टोलीकी लिबेरो सलिना श्रेष्ठको कप्तानीमा खेल्दैछ । अन्य खेलाडीहरुमा पुनम चन्द, कामना विष्ट, सफिया पुन, निशा चौधरी, अनुषा चौधरी, नेहा चौधरी र भावना तामाङ रहेका छन् । क्वीन्सले तीनजना विदेशी खेलाडीसमेत ल्याएर खेलाउने तयारी गरेको रुप्से स्पोर्टले जनाएको छ । टोलीको प्रशिक्षकमा उत्सव खड्का रहेका छन् ।

त्रिपुरेश्वरस्थित राष्ट्रिय खेलकुद परिषदको कभर्ड हलमा असोज १४ देखि १९ गतेसम्म सञ्चालन हुने महिला भलिबल लीगमा ६ टोलीको सहभागिता रहनेछ ।