सहकारी ठगी प्रकरण : छानबिन समितिको समय १५ दिन थपियो

काठमाडौं । सहकारी ठगी प्रकरणको छानबिनका लागि गठित संसदीय विशेष समितिको समयावधी १५ दिन थप गरिएको छ ।

आज बसेको प्रतिनिधि सभा बैठकमा एमाले सांसद एवं समितिका सभापति सूर्यबहादुर थापाले छानबिनका लागि समय अपुग भएको भन्दै समय थप गर्न प्रस्ताव प्रस्तुत गरेका थिए । उक्त प्रस्तावलाई सभाले सर्वसम्मतीले पारित गरेको हो ।

सहकारी ठगी प्रकरणमा छानबिनका लागि तत्कालीन प्रमुख प्रतिपक्षी दल नेपाली कांग्रेसले निरन्तर आवाज उठाएपछि ७ सदस्यीय छानबिन समिति गठन गरिएको थियो । जेठ १५ गते गठन गरिएको उक्त समितिको कार्याअवधि आगामी भदौ २२ गते सकिँदैछ ।

बैठकमा संयोजक थापाले हालसम्म समितिले आफ्नो कार्यादेशभित्र रही ५१ वटा बैठक बसेको सभालाई जानकारी गराए ।

त्यस्तै सहकारीको रकम हिनामिनामा आरोपित भनिएका ५० जना व्यक्तिहरुसँग सोधपुछ गरिसकिएको समेत उनले बताए ।

सहकारी ठगीको यथेष्ट प्रमाण जुटाउनका लागि आफ्नो कार्यादेश अनुसार संघ प्रदेश र स्थानीय तहका विभिन्न पक्षहरुसँग समन्वय गरिएको समेत उनले बताए ।