दोलखाको भीमेश्वर पाखलतीमा दुई सय महिलाहरूको पाठेघर जाँच

दोलखा । दोलखाको भीमेश्वर नगरपालिका–२ पाखलतीस्थित स्वास्थ्य चौकीमा स्थानीय दुई सय महिलाहरूको पाठेघर जाँच तथा परामर्श साथै सर्जिकल क्यान्सर सम्बन्धी स्वास्थ्य जाँच गरिएको छ ।

समाजसेवी दिपमणि राज भण्डारीको पहलमा रोटरी क्लब अफ ओकल्याण्ड र रोटरी क्लब अफ बयरा अमेरिकाको सहयोगमा स्वास्थ्य जाँच गरिएको हो ।

नेपाली कांग्रेस दोलखाका प्रवक्ता राकेश श्रेष्ठका अनुसार जनस्वास्थ्य सरोकार ट्रस्ट (पीएचइसिटी)को प्राविधिक सहयोग र काठमाडौं मोडेल अस्पतालका वरिष्ठ विशेषज्ञ डाक्टरहरुहरुको सहयोगमा ३० देखि ६० वर्ष उमेर समूहका महिलाहरूको निशुल्क जाँच गरिएको हो ।

पाठेघरको मुखको क्यान्सर पत्ता लगाउने अत्याधुनिक प्रविधिसहित स्वास्थ्य जाँच गराउन पाउँदा स्थानीय महिलाहरु खुसी भएको वडा नम्बर २ का वडाध्यक्ष स्टालिन श्रेष्ठले बताए ।

नेपालका अस्पतालहरुमा अत्याधुनिक उपकरणहरु उपलब्ध गराउन भूमिका निर्वाह गर्दै आएका समाजसेवी राज भण्डारीकै अगुवाइमा गतवर्ष  रोटरी क्लब, ओकल्याण्ड क्यार्लिफोनिया अमेरिकाको सहयोगमा पीएचइसिटी अन्तरगत सञ्चालित कीर्तिपुर अस्पताललाई महत्त्वपूर्ण स्वास्थ्य सामग्री एवं उपकरण निःशुल्क हस्तान्तरण गरिएको थियो ।

‘सर्भाइकल क्यान्सर स्क्रीनिङ एण्ड टेस्टिङ प्रोग्राम’मार्फत एचपिभी डिएनए टेस्ट ल्याब मेसिन हस्तान्तरण गरिएको थियो । सोही मेसिनका लागि आवश्यक पर्ने पीसीआर भ्याक्सिन (रिएजेन्ट केमिकल) सोही बेला उपलब्ध गराइएको थियो ।