झापामा दुई महिनामा झन्डै ५० करोड राजस्व संकलन

झापा ।  आन्तरिक राजस्व कार्यालयले चालु आर्थिक वर्षको पहिलो दुई महिनामा  ४९ करोड ९४ लाख आठ हजार राजस्व संकलन गरेको छ । संकलन भएको उक्त रकम चालु आवको वार्षिक लक्ष्यको १२ दशमलव ४७ प्रतिशत हो । 

आन्तरिक राजस्व कार्यालयको चालु आवमा  चार अर्ब ६१ लाख राजस्व संकलन गर्ने लक्ष्य रहेको कर अधिकृत भीमप्रसाद आचार्यले जानकारी दिए  । ‘साउन र भदौ महिनामा ५७ करोड ३६ हजार राजस्व संकलन गर्ने लक्ष्य रहेकोमा लक्ष्यको ८७ दशमलव ६१ प्रतिशत राजस्व संकलन भयो । चालु आवको पहिलो दुई महिनामा मन्दीका कारण लक्ष्यअनुसार राजस्व संकलन भएन, ’ उनले भने  । 

उक्त कार्यालयले आय करबाट  १५ करोड ७६ लाख १४  हजार, ब्याजबापत  दुई करोड ६१ लाख १७ हजार, मूल्य अभिवृद्धि करबापत  २० करोड १६ लाख ८७ हजार अन्तःशुल्कबापत  १० करोड ७८ लाख आठ हजार संकलन गरेको छ ।