सुनको मूल्य हालसम्मकै उच्च, किन बढिरहेको छ भाउ ?

काठमाडौं । मंगलबार नेपाली बजारमा सुनको मूल्यले पुनः नयाँ रेकर्ड बनाएको छ । यसअघि सोमबार प्रतितोला सुन १ लाख ५९ हजार २ सय रहेको थियो । आज तोलामा ५ सयले वृद्धि भइ सुनको मूल्य १ लाख ५९ हजार ७ सय कायम भइ कारोबार भइरहेको नेपाल सुनचाँदी व्यवसायी महासंघले जनाएको छ । यो हालसम्मकै उच्च मूल्य हो ।

त्यस्तै आज चाँदीको मूल्य भने तोलामा ५ रुपैयाँले गिरावट आएको छ । अघिल्लो कारोबार दिन चाँदीको मूल्य १ हजार ९ सय २० रहेकोमा आज मूल्य गिरावट आइ १ हजार ९ सय १५ कायम भइ कारोबार भइरहेको छ ।

पछिल्लो दिनहरुमा अन्तर्राष्ट्रिय बजारमा नै सुनको मूल्य बढिरहेको छ, जसको असर नेपालमा देखिएको हो ।

यसकारण आकाशियो सुनको मूल्य ?

नेपालमा सुनको मूल्य अन्तर्राष्ट्रिय बजार अनुसार समायोजन हुने भएकाले अन्तर्राष्ट्रिय बजार, वैदेशिक मुद्रा र अन्तर्राष्ट्रिय बैंकको ब्याजदरअनुसार नेपालमा सुनको मूल्य घटबढ हुने गरेको छ ।

पछिल्ला दिनहरुमा अन्तर्राष्ट्रिय साथै नेपाली बजारमा समेत सुनको मूल्यमा अत्याधिक वृद्धि हुनुमा युरोपेली केन्द्रीय बैंक (ईसीबी) ले ब्याजदर घटाएको असरलाई लिइएको छ । पछिल्लो समय ईसीसी ब्याजदर ०.२५ प्रतिशतले घटाएर ३.५० प्रतिशतमा पु¥याएपछि अन्तर्राष्ट्रिय बजारमा सुनको भाउ ह्वात्तै बढेको हो ।

त्यस्तै यसअघि पनि ईसीबीले यसै वर्षको जुनमा पहिलो पटक निक्षेपको ब्याजदर ४ प्रतिशतबाट घटाएर ३.७५ प्रतिशतमा झारेको थियो ।

त्यति मात्रै होइन अमेरिकी केन्द्रीय बैंकले फेडरल रिजर्भले पनि निक्षेपको ब्याजदर घटाउने निर्णय गरेको छ । जसको असर सुनको बजारमा देखिएको हो । ब्याजदर घटेपछि लगानीकर्ता डलरको सट्टा सुनमा लगानी गर्न उत्प्रेरित भएकाले सुनको माग र मूल्य बढेको बढेको हो । त्यसो त नेपाली बजारमा मात्रै होइन अन्तर्राष्ट्रिय बजारमा पनि सुनको मूल्यले नयाँ रेकर्ड बनाइरहेको छ । शुक्रबारको कुरा गर्दा अन्तर्राष्ट्रिय बजारमा बहुमूल्य पहेँलो धातु प्रति औंस २ हजार ५ सय ६८ दशमलव ५ अमेरिकी डलरमा कारोबार भएको छ ।

विश्लेषकहरुका अनुसार अन्तर्राष्ट्रिय बजारमा सुनको मूल्यको वर्तमान अवस्थालाई हेर्दा अन्तर्राष्ट्रिय बजारमा सुनको भाउ अझै बढ्ने र त्यसको प्रत्यक्ष असर नेपाली बजारमा पनि पर्ने देखिन्छ ।

त्यसका साथै आगामी नोभेम्बरमा हुने अमेरिकी राष्ट्रपतीय निर्वाचनको असर समेत सुनको बजारमा देखिएको छ । अमेरिकी राष्ट्रपतीय निर्वाचनले सम्भावित बजार अस्थिरताले लगानीकर्ताहरूलाई सुनको कारोबारतर्फ धकेल्न सक्ने, जसका कारण बजारमा माग बढी भएसँगै मू्ल्यमा समेत वृद्धि हुनक्ने विश्व गोल्ड काउन्सिलका बजार रणनीतिकार जोसेफ काभाटोनीको विश्लेषण रहेको छ ।

उनका अनुसार आफूहरुले पश्चिमी लगानीकर्ताहरुको माग बढाउने अन्य कारकहरुको मूल्यांकन गरेको र अमेरिकी निर्वाचनले बजार अनिश्चितता बढाउने कारणले पनि सुनको लगानीमा लगानीकर्ताहरु लाग्न सक्नेछन् ।

जोसेफ काभाटोनीले भने, ‘हामी पश्चिमी लगानीकर्ताबाट माग बढाउने अन्य कारकहरू पनि मूल्याङ्कन गर्दैछौं, जसमा आगामी अमेरिकी चुनावले अनिश्चितताले सुनको लगानीका बारेमा बजार विश्लेषण गरिरहेका छौँ ।’