काठमाडौं । बेन्फिकाले बुधबार राति एट्लेटिको मड्रिडलाई ४–० को फराकिलो अन्तरले पराजित गर्दै च्याम्पियन्स लिगमा लगातार दोस्रो जित हासिल गरेको छ ।
लिस्बनमा भएको खेलमा ब्रुनो लागेको टोलीले उत्कृष्ट प्रदर्शन गर्दै एट्लेटिको मड्रिडको बचाउलाई धरासायी बनायो । केरम अक्तुरकोग्लु, एन्जल डी मारिया, अलेक्जेन्डर बाह र ओरकुन कोक्चुले गोल गर्दै बेन्फिकालाई महत्त्वपूर्ण जित दिलाए ।
खेलको १३औँ मिनेटमा एट्लेटिकोको रक्षापंक्तिको गल्तीको फाइदा उठाउँदै अक्तुरकोग्लुले फ्रेड्रिक और्सनेसको पासमा बेन्फिकालाई अग्रता दिलाए । पहिलो हाफको अन्त्यतिर भान्जेलिस पाभिलिडिसले गोल गर्ने ठुलो अवसर गुमाए ।
दोस्रो हाफको सुरुवातमा पाभिलिडिसमाथि कन्अर ग्यालाघरले फाउल गरेपछि बेन्फिकालाई पेनाल्टीको मौका मिल्यो, जसलाई अर्जेन्टिना स्टार एन्जल डी मारियाले जन ओब्लाकलाई पराजित गर्दै २–० को अग्रता दिलाए ।
७५औँ मिनेटमा बाहले जन–निक्लास बेस्टेको कर्नरमा हेडरमार्फत तेस्रो गोल थपे । खेलको अन्त्यतिर सब्स्टिच्युट ज्वेकी अम्दुनीमाथि रिनिल्डोले फाउल गरेपछि अर्को पेनाल्टीको मौका मिल्यो, जसलाई ओरकुन कोक्चुले शीर्ष कोरामा प्रहार गर्दै बेन्फिकालाई ४-० को शानदार जित दिलाए ।
यो जितपछि बेन्फिका च्याम्पियन्स लिगको नयाँ लिग चरणमा बोरुसिया डर्टमण्ड र ब्रेस्टसँगै अंक तालिकाको शीर्ष तीन स्थानमा छ । एट्लेटिको मड्रिड भने २३औँ स्थानमा रहेको छ ।
एट्लेटिको मड्रिडले चार वर्षपछि पहिलो पटक च्याम्पियन्स लिग खेलमा चार गोल बेहोरेको हो । यो बेन्फिकाको घरेलु च्याम्पियन्स लिग खेलमा सबैभन्दा ठुलो जितमध्ये एक हो ।
यो खबर पढेर तपाईलाई कस्तो महसुस भयो ?
प्रतिक्रिया