कांग्रेसको वातावरण विभागद्वारा पार्टी कार्यालय र वरपरको परिसर सरसफाई

काठमाडौं । नेपाली कांग्रेस वातावरण तथा जलवायु परिवर्तन सरोकार विभागले केन्द्रीय कार्यालय र कार्यालय वरपरको परिसरमा सरसफाई गरेको छ ।

केही दिन अघिको अविरल वर्षा र नदीमा आएको बाढी र पहिरोले बगाएर ल्याएको फोहोरहरु तत्काल सफा गर्न आवश्यक देखिएकाले कांग्रेसले केन्द्रीय कार्यालय परिसर र वरपरको सरसफाई गरेको पार्टीका उपसभापति धनराज गुरुङले जानकारी दिए ।

उनले भने,‘गएको ११ र १२ गते अविरल वर्षाको कारण नदीमा आएको बाढीको कारण कार्यालय परिसर र वरपर जताततै ढल पानी पस्दा एक दमै धेरै फोहेर भएको थियो। नेपाली कांग्रेसको केन्द्रीय सदस्य कल्यान गुरुङको संयोजकत्वमा वातावरण तथा जलवायु परिवर्तन सरोकार विभाग छ । त्यसकै समन्वयमा सफा गरिरहेका छौँ ।’

यसै सिलसिलामा विभागले नेपाली कांग्रेस, केन्द्रीय कार्यालय, सानेपा, ललितपुर परिसर,पार्टी कार्यालय वरपरको परिसर, बागमति किनाराको पनि सरसफाई गरेको छ ।