वासिङ्टन । अमेरिकाको राष्ट्रपति पदका डेमोक्रेटिक उम्मेदवार कमला ह्यारिसले आफूसँग अर्ध–स्चालित पेस्तोल रहेको खुलासा गरेकी छन् । अमेरिकाको उपराष्ट्रपतिको उम्मेदवारसमेत रहेकी उनले यसलाई सुटिङ रेन्जमा चलाएकोसमेत बताएकी छन् ।
अमेरिकी उपराष्ट्रपतिको हतियार रोजाइबारे अड्कलबाजी चलिरहँदा उनले हालै टेलिभिजन स्टार ओप्रा विन्फ्रेलाई आफूसँग बन्दुक रहेको र आफ्नो घरमा कोही चोर पसेमा गोली हान्ने बताएकी थिइन् । ‘मसँग एउटा ग्लक धेरै समयदेखि छ,’ प्राइमटाइम सिबिएस सो ६० मिनेटमा अन्तर्वार्ता दिने क्रममा कस्तो किसिमको बन्दुक छ भनेर सोधिएको प्रश्नमा पूर्वअभियोजक एवं क्यालिफोर्नियाकी पूर्वमहानायाधिवक्ता ह्यारिसले भनिन्, ‘मेरो पृष्ठभूमि कानुन प्रवत्र्तनमा छ र त्यसैले त्यहाँ तपाईंको जवाफ छ ।’
अन्तर्वार्ताकार बिल ह्विटाकरले त्यसपछि उनलाई कहिल्यै ग्लक चलाउनुभएको छ भनेर साधेका थिए । उनले हाँस्दै जवाफ दिइन्, ‘निश्चय नै मैले सुटिङ रेन्जमा चलाएको छु ।’ अस्ट्रियाली निर्माता ग्लकले अमेरिकाको सबैभन्दा बढी बिक्री हुने ह्यान्डगनहरूमध्ये एक बनाउँछ । प्रहरीले व्यापक रूपमा प्रयोग गर्ने ग्लकले आफ्नो उपस्थितिका कारण चलचित्र र हिप–हप संस्कृतिमा लोकप्रियता पाएको छ ।
ह्यारिसको डेमोक्रेटिक पार्टीले नियमित रूपमा सशस्त्र अपराध र ठुलो मात्रामा गोलीकाण्डले प्रभावित अमेरिकामा बन्दुकको पहुँच कटौती गर्ने कुरामा जोड दिइरहेका बेला अहिलेसम्म ह्यारिसले आफूसँग बन्दुक रहेको कुरा बिरलै उल्लेख गरेकी थिइन् ।
यद्यपि रिपब्लिकन उम्मेदवार डोनाल्ड ट्रम्पसँगको कडा निर्वाचनमा ५९ वर्षीया डेमोक्रेट ह्यारिसले आफ्नो बन्दुकधारकको योग्यता देखाउन थालेकी छन् । ह्यारिसले अमेरिकी संविधानको दोस्रो संशोधनको उल्लंघन गर्दै अमेरिकीहरूको बन्दुक जफत गर्न चाहेको ट्रम्पले बारम्बार दाबी गर्दै आएका छन् ।
गत महिना भएको उनीहरूबीचको एउटा मात्र टेलिभिजन बहसमा पनि ट्रम्पले यो कुरा दोहोर्याएका थिए ।
आफू र आफ्नो उपराष्ट्रपति उम्मेदवार टिम वाल्ज दुवै बन्दुकधारक रहेको उल्लेख गर्दै ह्यारिसले उक्त आरोपलाई जोडदार रूपमा अस्वीकार गरिन् । ‘म बन्दुक मालिक हुँ,’ उनले सेप्टेम्बरमा विन्फ्रेसँग हाँस्दै भनिन्, ‘यदि कोही मेरो घरमा प्रवेश गर्छ भने उसलाई गोली लाग्नेछ ।’
आप्रवासन र अर्थतन्त्र जस्ता सम्वेदनशील विषयहरूमा सावधानीपूर्वक कठिन प्रश्नहरूको सामना गर्ने ह्यारिसको अन्तर्वार्तामा ग्लक खुलासा सबैभन्दा आकर्षक विषय थियो ।
यो खबर पढेर तपाईलाई कस्तो महसुस भयो ?
प्रतिक्रिया