लागुऔषधसहित दुई जना पक्राउ

काठमाडौं । धनकुटा र मकवानपुरबाट अवैध लागुऔषधसहित दुई जनालाई प्रहरीले पक्राउ गरेको छ ।

मकवानपुरको मनहरी गाउँपालिका–९ खरंगाबाट अवैध लागुऔषध गाँजा २ किलोग्रामसहित एक जनालाई बुधबार दिउँसो प्रहरीले पक्राउ गरेको हो । पक्राउ पर्नेमा सोही ठाउँ बस्ने ४९ वर्षीया चन्द्रमाया लो रहेकी छन् । इलाका प्रहरी कार्यालय मनहरीबाट खटिएको प्रहरी टोलीले उनको घरबाट उक्त गाँजा फेला पारी पक्राउ गरेको हो ।

यसैगरी धनकुटाको छथरजोरपाटी गाउँपालिका–२ जोरपाटीस्थित सडकबाट अवैध लागुऔषध खैरो हेरोइन जस्तो देखिने पदार्थ करिब ६० मिलिग्रामसहित सोही गाउँपालिका–६ बस्ने २५ वर्षीय विनोद राईलाई प्रहरीले पक्राउ गरेको छ । प्रहरी चौकी जोरपाटीबजारबाट खटिएको प्रहरी टोलीले उनलाई उक्त पदार्थसहित बुधबार दिउँसो पक्राउ गरेको हो ।

यस सम्बन्धमा प्रहरीले आवश्यक अनुसन्धान गरिरहेको छ ।