‘राजनीतिक अस्थिरताको अन्त्य नगरेसम्म देशमा भएका साधन, स्रोतको सही सदुपयोग गर्न  सकिँदैन’ 

काठमाडौं ।  नेकपा माओवादी केन्द्रका अध्यक्ष पुष्पकमल दाहालले नेपालमा  आर्थिक विकासको निम्ति प्रकृतिको असिमित स्रोत साधन भएर पनि प्रगति हुन नसकेको बताएका छन् । 

शुक्रबार हिन्दु आर्थिक फोरम, नेपाल बिजनेस मिट २०२४ प्यानल डिस्कसनलाई  सम्बोधन गर्दै उनले जग जमिन, जडीबुटी , मिहेनति जनशक्ति हुँदा पनि विकासको  गति नेपालले लिन नसकेको बताएका हुन् ।  

उनले भने, ‘नेपालमा आर्थिक विकासका निम्ति प्रकृतिले दिएको स्रोत साधन असिमित छ । जल जमिन, जडीबुटी , मिहेनति जनशक्ति पनि निकै धेरै छ, यो  सबै प्रकृतिले  दिएको र  इतिहासले  दिएको हाम्रो  विरासत जस्तो छ र  त्यो  विरासतले  दिएको  कुराहरूलाई समेटेर हामीले  नेपाललाई विकासको  गतितर्फ लग्नुपर्ने हो  तर त्यो हुन सकिरहेको  छैन ।’

साथै, उनले ओभर पोलिटीसाइजेशन र राजनीतिक अस्थिरता नै प्रगतिको बाधक रहेको बताए । उनले पोलिटीसाइजेशन र राजनीतिक अस्थिरताको स्थितिको अन्त्य गर्न नसकेसम्म देशमा भएका साधन, स्रोतको सही सदुपयोग गर्ने वातावरण नबन्ने उनको भनाइ छ ।

उनले भने, ‘हामीसँग साधन, स्रोतको कमी भएर पनि होइन । अध्ययनशील जनशक्तिको कमी भएर पनि होइन । बिजनेस अनुभव भएकाहरूको कमी भएर पनि होइन । फेरि पनि हामीले किन सोचेजस्तो प्रगति गर्न सकेका छैनौँ भन्दा चाहिँ ओभर पोलिटीसाइजेशन नै, राजनीतिक अस्थिरता नै यसको केन्द्रमा आउँछ भनेर हामीले भन्न हिचकिचाउन हुँदैन ।’