काठमाडौं । नेपाल समाजवादी पार्टी (नेसपा) का अध्यक्ष डा.बाबुराम भट्टराईले वर्तमान अवस्थामा वैकल्पिक शक्ति आवश्यक भएको बताएका छन् ।
सोमबार पोखरामा आयोजित पार्टीको प्रथम विधान अधिवेशनमा उनले उदारवादी राजनीतिलाई अपनाउने कांग्रेसलगायतका शक्तिहरूको विचार पुराना भएको भन्दै अब सबै प्रकारले वैकल्पिक शक्ति आवश्यक भएको बताए ।
उनले भने, ‘उदारवादी राजनीतिलाई अपनाउने कांग्रेसलगायतका शक्तिहरूको विचार पुरानो भयो । २१ औँ शताब्दीले नयाँ विचार ल्याउनुपर्छ । भर्खर मात्रै लोकतान्त्रिक प्रक्रिया पूरा गरेर पुँजीवादी राजनीति आर्थिक चरणबाट समाजवादी चरणमा प्रवेश गरेको सन्दर्भमा अब वैकल्पिक शक्ति चाहिन्छ भनेर नै नयाँ शक्ति अभियान सुरु गरेका हौँ ।
यसका साथै, उनले आफूले निजी स्वार्थको लागि जीवनमा कहिले केही काम नगरेको बताए । उनले स्वार्थका लागि भविष्यमा पनि कुनै काम नगर्ने प्रतिबद्धता जनाए ।
उनले भने, ‘म सबैको अगाडि छाती फुलाएर भन्न चाहन्छु । बाबुराम भट्टराईले निजी स्वार्थको लागि जीवनमा कहिले केही काम गरेन् । आज पनि गर्दैन् र भोलि पनि गर्दैन् । बाबुराम अर्थमन्त्री भयो, प्रधानमन्त्री भयो कोहीसँग पैसा लिएर जनताको अहित हुने काम गर्यो भनेर प्रमाणसहित आउने हो भने म जेल जान तयार छु । फाँसीमा चढ्न तयार छु ।’
विधिको शासन, अर्थतन्त्र र अहिलेका पार्टीहरूको कब्जाबाट मुलुक बाहिर ननिस्किएसम्म सुशासन सम्भव नहुने उनको भनाइ थियो ।
यो खबर पढेर तपाईलाई कस्तो महसुस भयो ?
प्रतिक्रिया