टिआईए कप अन्तरविद्यालय बास्केटबल प्रतियोगिता सुरु

काठमाडौं । टिआईए कप अन्तरविद्यालय बास्केटबल प्रतियोगिताको पहिलो दिन आयोजक ठुंग्रम इन्टरनेश्नल एकेडेमीले विजयी सुरुवात गरेको छ । काठमाडौंको हात्तिगौंडास्थित टिआईएको कोर्टमा भएको खेलमा घरेलु टोलीले मंगलदिप स्कुललाई २५ का विरुद्ध ३७ स्कोरले हराएको हो ।

 टिआईएको जितमा क्रिश ओलीले १७ स्कोरको योगदान गरे । पहिलो क्वार्टरदेखि नै अग्रता लिएको टिआईएले अग्रता चौथो सेटसम्मै कायम राख्यो । टिआईएले पहिलो क्वार्टरमा ११–५, दोस्रोमा १३–१० र तेस्रोमा ६–४ को अग्रता कायम राखेको थियो ।

चौथो क्वार्टरमा भने दुवै टिमले ६–६ स्कोर गरेका थिए । प्रतियोगिताको उद्घाटन बुढानीलकण्ठ नगरपालिकाका प्रमुख मिठाराम अधिकारीले गरेका थिए । टिआईएसँगै प्रतियोगिताको छात्रतर्फ आज भएको खेलमा दुर्गा भवानी एकेडेमी, ज्ञाननिकेतन र विल्सन एकेडेमी विजयी भए । छात्रातर्फ निम्स, भक्तपुर निस्ट र भ्याली पब्लिक स्कुलले पनि विजयी सुरुवात गरे ।