झाँक्री प्रकाश भुजेललाई अनुसन्धान गर्न अदालतबाट पाँच दिन म्याद थप

काठमाडौं । झाँक्री प्रकाश भुजेलमाथि अनुसन्धान गर्न प्रहरीले अदालतबाट पाँच दिन म्याद थप पाएको छ । भुजेलले हाँकेको गाडीको ठक्करबाट एक मोटर साइकल चालकको मृत्यु भएपछि पक्राउ परेका उनलाई जिल्ला अदालत काठमाडौंले पाँच दिन हिरासतमा राखेर अनुसन्धान गर्न प्रहरीलाई अनुमति दिएको हो ।

बुधबार भुजेलले हाँकेको गाडीले मोटरसाइकललाई ठक्कर दिँदा गम्भिर घाइते मोटरसाइकल चालक नारायण नगरकोटीको उपचारका क्रममा मृत्यु भएको थियो । मोटरसाइकलमा सवार उनकी पत्नी सानुमाया नगरकोटी भने गम्भीर घाइते भएकी छन् । उनको ग्राण्डी अस्पतालमा उपचार भइरहेको छ ।

बुधबार गाडी दुर्घटनापश्चात फरार रहेका भुजेलले साँझ नै बौद्ध प्रहरी समक्ष आत्मसमर्पण गरेका थिए । उलाई सवारी ज्यान मुद्दा लगाउने तयारी प्रहरीको छ ।