काठमाडौं । एजुकेशन प्लानेट प्रालि (ई–प्लानेट)ले दक्षिण एशियाको ‘टप अफ द टावर’ अवार्ड प्राप्त गरेको छ । अवार्ड एक्सिलेन्स अवार्ड २०२४ अन्तर्गत युनिभर्सिटी अफ टेक्नोलोजी सिड्नी (यूटिएस) ले प्रदान गरेको हो ।
अवार्डले दक्षिण एशियामा शैक्षिक परामर्श सेवामा उत्कृष्टता, विद्यार्थी सहयोग तथा विश्वव्यापी साझेदारीमा ई–प्लानेटको सफलतालाई सम्मानित गरेको ई–प्लानेटले विज्ञप्तिमार्फत जनाएको छ ।
अवार्ड यूनिभर्सिटीका डेपुटी भाइस–चान्सलर तथा भाइस–प्रेसिडेन्ट (इन्टरनेशनल)इयान वान तथा प्रो भाइस–चान्सलर (ग्लोबल पार्टनरसिप्स) लियो मियान लिउद्वारा ई–प्लानेटलाई प्रदान गरिएको हो । सम्मानलाई ई–प्लानेटले आफ्नो समर्पण, विद्यार्थीहरूको विश्वास तथा उत्कृष्ट शैक्षिक अवसर प्रदान गर्ने मिसनको प्रतिकको रूपमा लिएको जनाएको छ ।
‘यूटिएसबाट प्रतिष्ठित सम्मान प्राप्त गर्नु हाम्रो लागि गर्व र गौरवको कुरा हो । यसले हाम्रो टोलीको निरन्तर प्रयास, विद्यार्थीहरू तथा साझेदारहरूको विश्वास तथा दक्षिण एशियाली विद्यार्थीहरूलाई गुणस्तरीय शिक्षा प्रदान गर्ने हाम्रो प्रतिवद्धतालाई प्रतिविम्बित गर्छ,’ ई–प्लानेटका कार्यकारी निर्देशक नयन लामिछानेले बताएका छन् ।
ई–प्लानेटले यो वर्ष आफ्नो २०औँ वार्षिकोत्सव मनाइरहेको अवस्थामा पुरस्कारले संस्थाको यात्रामा अर्को एउटा महत्त्वपूर्ण उपलब्धि बनेको उल्लेख गर्दै यसले क्षेत्रीय स्तरमा शिक्षामूलक परामर्श सेवामा अग्रणी स्थानलाई अझ मजबुत बनाएको जनाएको छ ।
सन् २००५ मा स्थापना भएको एजुकेशन प्लानेट प्रालि (ई–प्लानेट) ले विदेशमा उच्च शिक्षा प्राप्त गर्न चाहने विद्यार्थीहरूलाई मार्गदर्शन गर्दै आएको छ ।
प्रमुख विश्वव्यापी संस्थाहरूसँगको साझेदारी र विद्यार्थीहरूको सफलताप्रति प्रतिबद्धताका साथ इ–प्लानेटले हजारौँ विद्यार्थीहरूलाई अमेरिका, क्यानडा, अस्ट्रेलिया र अन्य देशहरूमा सफलतापूर्वक पठाएको छ ।
यो खबर पढेर तपाईलाई कस्तो महसुस भयो ?
प्रतिक्रिया