काठमाडौं । सर्भरको समस्या देखाउँदै सेवा अवरुद्ध गरेको राहदानी विभागले आइतबार दिउँसोदेखि सेवा सुचारु गरेको दाबी गरेको छ । तर सेवाग्राहीले सेवा नपाएको गुनासो गरेका छन् ।
पाँच दिनदेखि नयाँ राहदानी बनाउन नपाएका सेवाग्राहीले त्रिपुरेश्वरस्थित राहदानी विभागको कार्यालय परिसरमा आइतबार होहल्ला समेत गरेका थिए । उनीहरूले छिटो सेवा सुरु गर्न माग गरेका थिए ।
विभागका प्रवक्ता विवेक रिजालले करिब तीन दिनजति सेवा समस्या आएको बताए । तर आइतबारदेखि सेवा सुचारु भएको उनले दाबी गरे । ‘सर्भरमा तथ्यांक व्यवस्थापनमा केही समस्या आएको हो । तर आइतबारदेखि आंशिक रूपमा समस्या समाधान भइसकेको छ । विस्तारै अन्य समस्याहरू समाधान हुँदै जानेछ । के कारणले समस्या आएको हो भन्ने विषयमा अध्ययन भइरहेको र केही दिनमा प्रतिवेदन आएपछि मात्र त्यसबारेमा बताउन सकिन्छ,’ उनले भने ।
विभागले आइतबार सूचना जारी गर्दै विभागको मुख्य कार्यालय, जिल्ला स्थित प्रशासन कार्यालयहरू र विदेशस्थित नेपाली नियोगहरूबाट राहदानी सेवा प्रभावित रहेको जानकारी दिएको थियो । तर आइतबार दिउँसोबाट सेवामा सहज भएको प्रवक्ता रिजालले जानकारी दिए । उनले मिडियामा बढी प्रचारबाजी भएको दुखेसो गरे ।
यद्यपि, विभागले सेवाग्राहीलाई परेको मर्काका लागि क्षमा याचना पनि गरेको छ । समस्या समाधानका लागि प्राविधिक टोलीले निरन्तर काम गरिरहेकाले सम्पूर्ण सेवा छिट्टै समाधान हुने जनाएको छ । अत्यावश्यक सेवा सुरु भएको र सबैतिर सामान्य हुन केही दिन लाग्ने विभागको भनाइ छ । पुरानो आवेदकहरूको काम सुचारु भएको जनाइएको छ ।
सेवा रोकिँदा राहदानी बनाएर विदेश उड्नुपर्ने र प्रक्रिया थाल्नुपर्नेहरु प्रभावित भएका छन् । बुधबारदेखि नै राहदानी वितरणको सबै कामकाज ठप्प भएको थियो । विभागले गत शुक्रबार सबै जिल्ला प्रशासन कार्यालयहरूलाई परिपत्र गरेर समस्या समाधान गर्न प्राविधिक समूहले काम गरिरहेको जानकारी गराएको थियो ।
यो खबर पढेर तपाईलाई कस्तो महसुस भयो ?
प्रतिक्रिया