सौन्दर्य बढाउन गालामा ५० थप्पड !

काठमाडौं । संसारभरका महिला या पुरुष आफ्नो सुन्दरता बढाउनको सबै खाले उपायहरू प्रयोग गर्छन् । सुन्दरता बढाउनको लागि एउटा अनौठो उपचार प्रचलित छ । जहाँ थप्पड हानेर मानिसको सौन्दर्य बढाइन्छ । यसलाई स्लेप थेरापी भनिन्छ । यो दक्षिण कोरियामा धेरै लोकप्रिय छ ।

दक्षिण कोरियाका महिलाहरूले सयौँ वर्षदेखि स्लेप थेरापी गर्दै आएका छन् । यसमा महिलाहरूले आफ्नो सौन्दर्य बढाउनका लागि हरेक दिन आफ्नो गालामा ५० थप्पड लगाउँछन् । यो थेरापीले छालाको सौन्दर्य बढाउने विश्वास गरिन्छ । जसले गर्दा महिलाहरू धेरै सुन्दर हुन्छन् ।

स्लेप थेरापीको अर्थ कसैलाई दुख्ने गरी थप्पड हान्ने भन्ने होइन । यो धेरै सहज तरिकाले र हल्का हातले गालामा थप्पड लगाइन्छ । महिलाहरूले यो उपचार आफ्नै हातले पनि गर्न सक्छन् । तपाईँले थेरापी गर्दा दुवै गालाहरूलाई आफ्नो हातले हल्कासँग पिट्नु पर्छ । दक्षिण कोरियामा यो थेरापी प्राचिनकालदेखि नै प्रचलनमा रहे पनि बिस्तारै यो थेरापी विश्वभर फैलिरहेको छ ।

यस थेरापीको माध्यमबाट गालामा हल्का थप्पड लगाउँदा अनुहारको प्रत्येक भागमा रगतको प्रवाह बढ्छ भन्ने दक्षिण कोरियाका मानिसहरूको विश्वास छ । यसले छाला सफा गर्न मद्दत गर्छ । थप्पडको कारण अनुहारमा ताजा रगत बग्छ । जसले गर्दा अनुहारमा चमक आउँछ । तपाईँलाई यो थाहा पाउँदा छक्क पर्नुहुनेछ कि दक्षिण कोरियाका महिलाहरू हरेक दिन यो थेरापी गर्ने गर्छन् । कोरियन महिलाहरूले बाल्यकालदेखि नै यो थेरापी गर्दे आएकाले उनीहरूको उमेर बढ्दै गए पनि छालाको चमक भने कायमै रहन्छ । एजेन्सी